ఈ వెన్నుపోటేంది సీనియర్‌ గారు

ఈ వెన్నుపోటేంది సీనియర్‌ గారు

సీఎల్పీనేత జానారెడ్డిపై కాంగ్రెస్‌ నేతలు అంతర్గత సంభాషణల్లో ఘాటు వ్యాఖ్యలు చేస్తున్నారు. పార్టీ పరంగా మహారాష్ట్ర ఒప్పందంపై మండిపడుతుంటే..తుమ్మిడిహెట్టి వద్ద 152 మీ. ఎత్తు ప్రతిపాదించామని కానీ ఒప్పందం జరగలేదని జానారెడ్డి పేర్కొనడం కాంగ్రెస్‌ నేతలు గుర్రుగా ఉన్నారు.తరుచూ అధికార టీఆర్‌ఎస్‌కు అనుకూలంగా వ్యాఖ్యలు చేయడాన్ని కాంగ్రెస్‌ నేతలు జీర్ణించుకోలేకపోతున్నారు. అధికారపార్టీ అవలంభిస్తున్న ప్రజావ్యతిరేక విధానాలపై ముందుండి పోరాడాల్సిన జానా తరుచూ అస్త్రసన్యాన్నట్లుగా మాట్లాడడం ఏమిటనీ ప్రశ్నిస్తున్నారు. ఇది కోవర్ట్‌ ఆపరేషన్‌లో కొత్త కోణంగా కనిపిస్తోందని పేర్కొంటున్నారు.

గత రెండేళ్లుగా టీఆర్‌ఎస్‌ ప్రభుత్వం అనుసరిస్తున్న ప్రజావ్యతిరేక విధానాలపై గళం విప్పాల్సిన జానా, ఆయాచితంగా అధికారపార్టీ చేపడుతున్న అభివృద్ధి, సంక్షేమపథకాలకు కితాబిచ్చే విధంగా మాట్లాడుతుండడం ఏంటని పార్టీ నేతలు విస్మయం వ్యక్తం చేస్తున్నారు. జానా వైఖరి వల్ల తరుచూ పార్టీనాయకత్వం ఆత్మర క్షణలో పడాల్సిన పరిస్థితి నెలకొంటుందని ఆందోళన వ్యక్తం చేస్తున్నారు. గతంలో జీహెచ్‌ఎంసీ ఆధ్వర్యంలో ప్రవేశపెట్టిన ఐదు రూపాయల భోజన పథకాన్ని అభినందించిన జానా, ఇప్పుడు ఏకంగా తుమ్మిడిహెట్టి వద్ద ప్రాజెక్టుపై మహారాష్ట్రతో అసలు ఎటువంటి ఒప్పందం జరగలేదని కుండబద్దలు కొట్టడంపై కాంగ్రెస్‌ నేతలు శ్రేణులు నారాజ్‌ అవుతున్నాయి. తుమ్మిడిహెట్టి వద్ద 152 మీ. ఎత్తు ప్రతిపాదించామని కానీ ఒప్పందం జరగలేదని జానారెడ్డి పేర్కొనడం కాంగ్రెస్‌ నేతలు గుర్రుగా ఉన్నారు. సాగునీటి ప్రాజెక్టులపై అధికారపార్టీని ఇరకాటంలో పెట్టేందుకు పార్టీ నాయకత్వం ఒకవైపు ప్రయత్నిస్తుంటే, మరొక వైపు జానా దానికి భిన్నంగా స్పందించడమేమిటన్న వ్యాఖ్యలు వినిపిస్తున్నాయి. తుమ్మిడిహెట్టి వద్ద 152 ఎత్తుపై మహారాష్ట్రతో ఎటువంటి ఒప్పందం జరగలేదని జానా పేర్కొనడంతో, అధికారపార్టీ నేతలిప్పుడు అదే విషయాన్ని ప్రస్తావిస్తూ కాంగ్రెస్‌పై ఎదురుదాడికి సిద్ధమయ్యారని ఆపార్టీ నేతలు గుర్తు చేస్తున్నారు. నిజామాబాద్‌ ఎంపీ కవిత, ఎమ్మెల్సీలు రాజేశ్వర్‌రెడ్డి, వెంకటేశ్వర్లు మీడియాతో మాట్లాడుతూ జానా మినహా కాంగ్రెస్‌ నేతలంతా అబద్ధాలు చెబుతున్నారని పేర్కొన్నారు.

ఇప్పటికైనా జానా తనవైఖరి మార్చుకోవాలని అధికారపార్టీపైన ఎదురుదాడి చేయకపోయిన సరే కానీ వారికి అస్త్రాలందించే విధంగా మాట్లాడడం సరికాదని వ్యాఖ్యానిస్తున్నారు. ఆదిలాబాద్‌ జిల్లా కేంద్రంలో రైతు గర్జన సక్సెస్‌, సాగునీటి ప్రాజెక్టులపై పవర్‌పాయింట్‌ ప్రజెంటేషన్‌ అనంతరం మహా ఒప్పందాన్ని నిరసిస్తూ అన్ని జిల్లా కలెక్టరేట్ల ముందు ధర్నాకు దిగిన టీ-పీసీసీ నాయకత్వం మహా ఒప్పందం వల్ల రాష్ట్రానికి జరిగే అన్యాయాన్ని వివరిస్తూ ప్రజల్లోకి చొచ్చుకువెళ్లాలని నిర్ణయించింది. అయితే ఇంతవరకు అంతబాగానే ఉన్నా తుమ్మిడిహెట్టి వద్ద గతంలో 152మీ ఎత్తుతో ప్రాజెక్టు నిర్మించేందుకు ఎటువంటి ఒప్పందం జరగలేదన్న జానా వ్యాఖ్యలతో ఒక్కసారిగా పార్టీ నేతలు నీరుగారిపోయినట్లు తెలుస్తోంది. మహాఒప్పందం వల్ల రాష్ట్రానికి తీరని అన్యాయం జరుగుతుందన్న విపక్షాల వాదనతో ఆత్మరక్షణలో పడినట్లు కన్పించిన అధికారపార్టీ, జానా వ్యాఖ్యలతో రెట్టించిన ఉత్సాహంతో ప్రధానప్రతిపక్షం కాంగ్రెస్‌, టీ-టీడీపీలపై ఎదురుదాడి ప్రారంభించింది.

 

రాజకీయ వార్తలు

 

సినిమా వార్తలు