చీకట్లో మొబైల్‌ చూస్తున్నారా.. ఈ డేంజర్‌ గురించి తెలుసుకోండి..

రాత్రి నిద్రపోయే ముందు ఫోన్‌ చూడటం చాలామందికి అలవాటుగా మారిపోయింది. గదిలో లైట్లు ఆపేసిన తర్వాత కూడా మొబైల్‌ స్క్రీన్‌ వెలుతురులో సోషల్ మీడియా, వీడియోలు, చాటింగ్‌ చేస్తూ సమయం గడుపుతుంటారు. ఐదు నిమిషాలు అనుకుని మొదలుపెట్టిన స్క్రోలింగ్‌ కాస్తా గంటల వరకు కొనసాగుతుంది. అయితే చీకట్లో ఎక్కువసేపు ఫోన్‌ చూడటం వల్ల కళ్లకు ఇబ్బంది కలిగే అవకాశం ఉంది.

చుట్టూ చీకటిగా ఉండి, కళ్ల ముందు మాత్రం ప్రకాశవంతమైన స్క్రీన్‌ కనిపిస్తే కళ్లపై ఒత్తిడి పెరుగుతుంది. ముఖ్యంగా స్క్రీన్‌ను చాలా దగ్గరగా పెట్టుకుని ఎక్కువసేపు చూస్తే కళ్లలో అలసట, మంట, భారంగా అనిపించడం, వెలుతురు ఎక్కువగా ఉన్నట్లు అనిపించడం వంటి లక్షణాలు కనిపించవచ్చు. కొంతసేపు చూపు మసకగా అనిపించడం కూడా జరుగుతుంది.

ఫోన్‌ చూస్తున్నప్పుడు మనం స్క్రీన్‌పై ఎక్కువగా దృష్టి పెడతాం. దాంతో సహజంగా రెప్పలు కొట్టే సంఖ్య తగ్గుతుంది. సాధారణంగా రెప్పలు వేయడం వల్ల కళ్లలో తేమ ఉండేలా సహాయపడుతుంది. కానీ ఎక్కువసేపు మొబైల్‌ చూస్తే ఈ తేమ తగ్గి కళ్లు పొడిబారడం, మంట, ఎర్రబడటం, దురద లేదా కంట్లో ఏదో పడినట్లు అనిపించడం వంటి సమస్యలు రావచ్చు.

రాత్రిపూట మొబైల్‌ వాడటంతో నిద్ర కూడా ప్రభావితమవుతుంది. ఫోన్‌ వంటి డిజిటల్‌ పరికరాల నుంచి వచ్చే కాంతి శరీరంలోని సహజ నిద్ర చక్రంపై ప్రభావం చూపుతుంది. ముఖ్యంగా నిద్రకు ముందు ఎక్కువసేపు స్క్రీన్‌ చూస్తే నిద్ర పట్టడం ఆలస్యం కావచ్చు. నిద్ర సమయం తగ్గడం లేదా నిద్రలో అంతరాయం ఏర్పడే అవకాశం కూడా ఉంటుంది.

మొబైల్‌ నుంచి వచ్చే బ్లూ లైట్‌ వల్ల రెటీనా శాశ్వతంగా దెబ్బతింటుందని తరచుగా ప్రచారం జరుగుతుంది. అయితే సాధారణ డిజిటల్‌ పరికరాల నుంచి వచ్చే బ్లూ లైట్‌ వల్ల మన కళ్లకు శాశ్వత నష్టం జరుగుతుందని నిరూపించే బలమైన ఆధారాలు ప్రస్తుతం లేవు. ఎక్కువసేపు స్క్రీన్‌ చూడటం వల్ల వచ్చే కంటి అలసట, పొడిబారడం వంటి సమస్యలు మాత్రం వాస్తవమే.

చీకట్లో ఫోన్‌ చూస్తున్నప్పుడు కొన్నిసార్లు ఒక కన్ను దిండు లేదా దుప్పటితో కప్పబడి, మరో కన్ను స్క్రీన్‌ వెలుతురును చూస్తుంటుంది. అలాంటి సమయంలో ఫోన్‌ను ఒక్కసారిగా ఆపిన వెంటనే కొద్దిసేపు చూపు సరిగా కనిపించకపోవచ్చు. రెండు కళ్లూ వెలుతురుకు అలవాటు పడిన విధానంలో తేడా ఉండటం దీనికి కారణం కావచ్చు. అయితే అకస్మాత్తుగా చూపు కోల్పోవడం మాత్రం నిర్లక్ష్యం చేయకూడదు.

కళ్లపై ఒత్తిడిని తగ్గించాలంటే పూర్తిగా చీకట్లో ఫోన్‌ చూడకుండా గదిలో తక్కువ స్థాయిలో వెలుతురు ఉండేలా చూసుకోవాలి. స్క్రీన్‌ బ్రైట్‌నెస్‌ను తగ్గించి, ఫోన్‌ను కళ్లకు మరీ దగ్గరగా పెట్టుకోకూడదు. తరచూ రెప్పలు వేయడం, మధ్యలో విరామం తీసుకోవడం అలవాటు చేసుకోవాలి. ప్రతి 20 నిమిషాలకు ఒకసారి సుమారు 20 అడుగుల దూరంలోని వస్తువును 20 సెకన్ల పాటు చూడడం ద్వారా కళ్లకు విశ్రాంతి ఇవ్వవచ్చు.

కళ్లలో మంట, పొడిబారడం లేదా అలసట అప్పుడప్పుడు రావడం సాధారణమే. కానీ చూపు నిరంతరం మసకబారడం, కళ్ల ముందు వెలుగులు మెరుస్తున్నట్లు కనిపించడం, ఫ్లోటర్స్‌ ఎక్కువగా కనిపించడం లేదా అకస్మాత్తుగా చూపు తగ్గడం వంటి లక్షణాలు ఉంటే వెంటనే కంటి వైద్యుడిని సంప్రదించాలి.