నిజం: ‘8’ కోసం.. ‘కోటి’ రూపాయ‌లు

సెంటిమెంటు ఉండొచ్చు. కానీ.. దానికి కూడా కొన్ని హ‌ద్దులు ఉంటాయి. ఉండాలి కూడా. కానీ.. రాను రాను ఈ సెంటిమెంటు పిచ్చి ముదురుతోంది. ఇది చేస్తే జీవితం మారుతుంది.. అది చేస్తే.. పెళ్లి జ‌రుగుతుంది.. అని విశ్వ‌సిస్తున్న వారి సంఖ్య పెరుగుతోంది. తాజాగా అసోచాం సంస్థ చేసిన అధ్య‌య‌నంలో దేశంలో పూజ‌లు, వ్ర‌తాలు చేసుకునే వారు పెరుగుతున్న‌ట్టు తెలిసింది. అయితే.. వీరిలో వృద్ధులు, గృహిణుల కంటే కూడా.. ఐటీఉద్యోగాలు చేసుకుంటున్న యువ‌తీయువ‌తులు పెరుగుతున్న‌ట్టు తేల‌డం విశేషం.

కార‌ణం ఏదైనా.. శుక్ర‌వారాలు, మంగ‌ళ‌వారాల సెంటిమెంటుతో పాటు.. ఇప్పుడు మూహూర్తాలు, టైం కు కూడా సెంటిమెంటు వ‌చ్చి చేరింది. ఇది గ‌మ‌నించే ఏమో.. ప్ర‌ఖ్యాత మీడియా సంస్థ‌లు కూడా.. ‘జాత‌కాల’పై ప్ర‌త్యేక పేజీల‌ను నిర్వ‌హిస్తున్నాయి. స‌మ‌స్య మీది.. ప‌రిష్కారం మాది అంటూ.. పెద్ద ఎత్తున ప్ర‌జ‌ల సెంటిమెంటుకు.. మ‌రింత దోహ‌ద‌ప‌డుతున్నాయి. ఈ సెంటిమెంటు ప‌రంప‌ర ఎక్క‌డి వ‌ర‌కు చేరిందంటే.. ఓ వ్య‌క్తి ఏకంగా.. ఫ్యాన్సీ నెంబ‌రు కోసం కోటీ 17 ల‌క్ష‌ల 12 వేల రూపాయ‌ల‌కుపైగా.. చెల్లించే వ‌ర‌కు చేరింది.

ఆశ్చ‌ర్యంగా ఉన్నా నిజం.. వాహ‌నాలు కొనుగోలు చేసేవారు.. నెంబ‌ర్ సెంటిమెంటును(న్యూమ‌రాల‌జీ) న‌మ్ముకుంటున్నారు. ఈ క్ర‌మంలో త‌మ వాహ‌నాల‌కు ఉండే రిజిస్ట్రేష‌న్ నెంబ‌రు విష‌యంలో ఎక్క‌డా రాజీ ప‌డ‌డం లేదు. ఇక‌, వినియోగ‌దారుల సెంటిమెంట‌ను ఆయా రాష్ట్రాల రోడ్డు ర‌వాణా శాఖ‌లు క్యాష్ చేసుకుంటున్నాయి. ఇలానే.. తాజాగా హ‌రియాణా రోడ్డు ర‌వాణా సంస్థ కూడా.. బుధ‌వారం నిర్వ‌హించిన‌.. నెంబ‌ర్ల వేలం పాట‌లో ఆ శాఖ‌కు ఊహించ‌ని విధంగా సొమ్ము వ‌చ్చి చేరింది.

‘HR88B8888’ రిజిస్ట్రేషన్ నంబర్ కోసం హ‌రియాణా ఆర్టీఏ అధికారులు నిర్వ‌హించిన వేలం పాట‌లో ఓ వ్య‌క్తి ఏకంగా కోటీ 17 ల‌క్ష‌ల రూపాయ‌ల పైచిలుకు మొత్తం వెచ్చించి.. ఈ నెంబ‌రును కైవ‌సం చేసుకున్నారు. వాస్త‌వానికి అధికారులు రూ.10-20 ల‌క్ష‌ల లోపే ఇది ప‌లుకుతుంద‌ని అనుకున్నారు. అందుకే.. దీనికి ప్రారంభ పాట‌గా.. రూ.50 వేలు నిర్ణ‌యించారు. కానీ, ‘8 సెంటిమెంటు కావ‌డంతో ఓ వ్య‌క్తి దీనిని కోటికి పైగా వెచ్చించి ద‌క్కించుకున్నారు. ఇది.. ఇప్ప‌టి వ‌ర‌కు దేశంలో నెంబ‌ర్లు కొనుగోలు చేసిన వారిలో రికార్డు అని అధికారులు పేర్కొన్నారు.

8- ప్ర‌త్యేక‌త ఏంటి?

సంఖ్యా శాస్త్రంలో 9 కి ఉన్న ప్ర‌త్యేక‌త అంద‌రికీ తెలిసిందే. కానీ, వాహ‌నాలు, ర‌వాణా రంగానికి సంబంధించి 6, 8 సంఖ్య‌ల‌కు కూడా ఎంతో ప్రాధాన్యం ఉంది. ఈ నేప‌థ్యంలో 8 సంఖ్య‌కు ఉన్న ప్ర‌త్యేక‌త‌ను చూస్తే.. ఇది అనేక సంప్రదాయాలలో అదృష్ట లేదా శుభ సంఖ్యగా పరిగణిస్తున్నారు. ఇది చైనీస్ సంస్కృతిలో సంపద, ఇత‌ర దేశాల‌లో కొత్త ప్రారంభాలకు శుభ‌సూచ‌కంగా ఉంటుది. దీని క్షితిజ సమాంతర ధోరణి అనంత చిహ్నాన్ని పోలి ఉంటుంది, ఇది శాశ్వతత్వం.. అపరిమిత సామర్థ్యాన్ని సూచిస్తుంది. ఎందుకంటే.. 8 సంఖ్య ఎక్క‌డా ‘అంతం’ కాక‌పోవ‌డ‌మే పెద్ద ప్ల‌స్‌. ఇత‌ర సంఖ్య‌లు ఎండ్ అవుతాయి. కానీ, 8 అలా ఎండ్ కాక‌పోవ‌డం గ‌మ‌నార్హం. అందుకే దీనికి ప్రాధాన్యం ఉంది.