ట్రంప్ తీరుపై సుందర్ పిచాయ్ అసంతృప్తి

మహమ్మారి వైరస్ వ్యాప్తిని అరిక‌ట్టేందుకు అమెరికా అధ్యక్షుడు డొనాల్డ్ ట్రంప్ పలు చర్యలు చేపట్టిన సంగతి తెలిసిందే. వైరస్ వ్యాప్తికి అడ్డుకట్ట వేసేందుకు అమెరికాకు వచ్చే వ‌ల‌స‌లదారుల‌‌పై ట్రంప్ ఏప్రిల్ నుంచి 3 నెలల తాత్కాలిక నిషేధం విధించారు. వైరస్ వ్యాప్తి మరింత తీవ్రతరం కావడంతో తాజాగా ఆ నిషేధాన్ని డిసెంబరు వరకు పొడిగిస్తూ ట్రంప్ సంచ‌ల‌న నిర్ణ‌యం తీసుకున్నారు.

అమెరికాలో నిరుద్యోగ స‌మ‌స్య‌ను అరికట్టేందుకే ట్రంప్ హెచ్‌1-బీ, హెచ్-4 స‌హా అన్ని ర‌కాల టెంప‌ర‌రీ వ‌ర్క్ వీసాల‌పై నిషేధం కొనసాగించాలని ఆదేశాలు జారీ చేశారు. ట్రంప్ నిర్ణ‌యంతో హెచ్‌1-బీ వీసాలు, ఎల్ వీసాలు, హెచ్‌2-బీ సీజనల్ వర్కర్ వీసాలు, జే వీసాలతో అమెరికాలోకి వచ్చేందుకు అవసరమైన అన్నిరకాల వీసాలకు తాత్కాలికంగా బ్రేక్ పడింది. వ‌ర్క్ వీసాల‌పై నిషేధం జూన్ 24 నుంచి డిసెంబర్ 31 వరకు అమ‌ల్లో ఉంటుంది. అయితే, ట్రంప్ నిర్ణయంపై గూగుల్ సీఈవో సుంద‌ర్ పిచాయ్ అసంతృప్తి వ్యక్తం చేశారు.

ట్రంప్ నిర్ణయంపై సుంద‌ర్ పిచాయ్ స్పందించారు. ఇమ్మిగ్రంట్ వీసాలపై ట్రంప్ తీరును సుందర్ పిచాయ్ తప్పుబట్టారు. అమెరికా ఆర్థిక రంగంలో సాధించిన విజయాల్లో ఇమ్మిగ్రేష‌న్ వీసాలు ఎంతగానో సహకరించాయని పిచాయ్ చెప్పారు.

ఇమ్మిగ్రెంట్ల సహకారం కూడా తోడవడంతోనే అమెరికా సాంకేతికపరంగా గ్లోబ‌ల్ లీడ‌ర్‌గా ఎదిగిందని సుందర్ పిచాయ్ గుర్తు చేశారు. గూగుల్ సహా పలు దిగ్గజ సంస్థలు గొప్ప స్థానాల్లో ఉండడానికి ఇమ్మిగ్రేషన్‌ విధానం కారణమని పిచాయ్ అభిప్రాయపడ్డారు. ట్రంప్ ప్రకటనతో నిరుత్సాహపడ్డామని, తాము ఇమ్మిట్రంట్లను ప్రోత్సహిస్తూనే ఉంటామని, అర్హత ఉన్నవారందరికీ దేశంతో సంబంధం లేకుండా అవ‌కాశాలు క‌ల్పిస్తూనే ఉంటామ‌ని ప్రకటించారు.