టీ కాంగ్రెస్ టీటీడీపీ అయితే… టీఆర్ఎస్ కూడా టీడీపీయేగా..!

తెలంగాణ పీసీసీ అధ్య‌క్షుడిగా రేవంత్ రెడ్డిని నియ‌మించిన వెంట‌నే ఇటు టీఆర్ఎస్ వాళ్లు.. అటు కాంగ్రెస్‌లో రేవంత్ శ‌త్రువులు.. ఇటు ఏపీలో చంద్ర‌బాబుకు వ్యతిరేకంగా ఉండే వైసీపీ వాళ్లు.. చివ‌రకు తెలంగాణ‌లో కొత్త‌గా పార్టీ పెట్టిన ష‌ర్మిల ఇలా అంద‌రూ ఒక్క‌టే డైలాగ్ కామ‌న్‌గా అందుకున్నారు. టీ పీసీసీ కాదు టీటీడీపీ అని.. ! చివ‌ర‌కు కోమ‌టిరెడ్డి అయితే ఓటుకు నోటుతో ఎలా ఓటు కొనాల‌ని చూశాడో… అలాగే డ‌బ్బుతో పీసీసీ కొనుక్కున్నాడ‌ని విమ‌ర్శించారు. స‌రే ఇదిలా ఉంటే ఈ రోజు చిట్‌చాట్‌లో రేవంత్ టీపీసీసీని టీ టీడీపీ అన్న వాళ్లకు, అటు కేసీఆర్‌, కేటీఆర్‌, హ‌రీష్‌కు అదిరిపోయే కౌంట‌ర్లు ఇచ్చారు.

నాపై విమర్శ‌లు చేసేందుకు బావ‌, బావ‌మ‌రుదులు అయిన కేటీఆర్‌, హ‌రీష్‌రావు పోటీ ప‌డుతున్నార‌ని.. హుజూరాబాద్ ఉప ఎన్నిక కోస‌మే ఎల్‌.ర‌మ‌ణ‌ను టీఆర్ఎస్‌లో చేర్చుకుంటున్నార‌ని మండిప‌డ్డారు.

కేటీఆర్‌కు పౌరుషం ఉంటే ఆంధ్రా నాయ‌కుడు రామారావు పేరు మార్చాల‌ని రేవంత్ డిమాండ్ చేశారు. కేటీఆర్ పేరును కేడీఆర్ అని మార్చిన రేవంత్ దాన‌ర్థం క‌ల్వ‌కుంట్ల డ్రామారావు అని చెప్పారు. ఇక కేసీఆర్‌, కేటీఆర్‌ల బ‌తుకు అంతా తెలుగుదేశం అయితే… హ‌రీష్‌రావు బ‌తుకు కాంగ్రెస్ అని ఎద్దేవా చేశారు.

టీ కాంగ్రెస్ టీడీపీ అయితే.. టీఆర్ఎస్ కూడా టీడీపీనే క‌దా ? అని రేవంత్ లాజిక్ చెప్పారు. ఇక కేసీఆర్ కేబినెట్లో ఉన్న మంత్రుల్లో 75 శాతం తెలుగుదేశం వాళ్లు అయితే… కొంద‌రు కాంగ్రెస్ మంత్రులు లేరా ? అని రేవంత్ ప్ర‌శ్నించారు. వాళ్ల నాన్న ముఖ్య‌మంత్రి ప‌ద‌వి ఇవ్వ‌ట్లేద‌నే కేటీఆర్ బాధ‌ప‌డుతున్నార‌ని… హరీష్ కు 2004లో కాంగ్రెస్ రాజకీయ బిక్ష పెడితే.. 2009లో కేటీఆర్‌కు తెలుగుదేశం రాజ‌కీయ బిక్ష పెట్టింద‌ని రేవంత్ చెప్పారు.