తండ్రి పార్టీ అధినేత.. టికెట్ కోసం ఇంటర్వ్యూకు వచ్చిన కొడుకు..

సినిమాటిక్ గా కనిపించొచ్చు. లెక్క అంటే లెక్కగా ఉండటం అన్ని చోట్ల.. అన్ని సందర్భాల్లో సాధ్యం కాకపోవచ్చు. కానీ.. తమిళనాడు రాజకీయాలు కాస్త భిన్నం. మిగిలిన రాష్ట్రాల్లోని తీరుతో ఏ మాత్రం సంబంధం లేకుండా తమదైన పద్దతిలో టికెట్ల ఎంపికను పూర్తి చేస్తాయి. ఎక్కడి దాకానో ఎందుకు? మన తెలుగు రాష్ట్రాల్లోని రాజకీయ పార్టీలు ఎన్నికల వేళ టికెట్లను ఎలా ఫైనల్ చేస్తాయో అందరికి తెలిసిందే.

అధినేత ఎవరు పేరు ఫైనల్ చేస్తే వారే పార్టీ తరఫున బరిలోకి దిగుతారు. తమిళనాడులోనూ అలాంటిదే ఉంటుంది. కానీ.. అంతకు ముందు కాస్త భిన్నమైన పద్దతిని అక్కడ అనుసరిస్తారు. పార్టీ టికెట్ కావాల్సిన వారు.. ఎవరైనా సరే పార్టీ ప్రధాన కార్యాలయానికి రావాలి. అక్కడ అప్లికేషన్ పెట్టుకోవాలి. తాజాగా జరుగుతున్న తమిళనాడు అసెంబ్లీ ఎన్నికల సందర్భంగా ఆసక్తికర సీన్ ఒకటి చోటు చేసుకుంది.

చెన్నై మహానగరంలోని చేపాక్కం-ట్రిప్లికేన్ నియోజకవర్గం నుంచి పోటీ చేయాలని భావిస్తున్నారు డీఎంకే యువజన విభాగ కార్యదర్శి ఉదయనిధి స్టాలిన్. ఇతడెవరంటారా? ఇంకెవరు డీఎంకే అధినేత స్టాలిన్ ముద్దుల కొడుకు. అయితే.. మాత్రం పార్టీ టికెట్ కావాలంటే డీఎంకే ఆఫీసుకు వచ్చి.. పార్టీ ఎన్నికల టీంను కలిసి.. సంప్రదాయపద్దతిలో టికెట్ కోరాలి. వారు చేసే ఇంటర్వ్యూకు హాజరు కావాల్సి ఉంటుంది. దీనికి ఎవరూ మినహాయింపు కాదు. తాజాగా స్టాలిన్ కుమారుడు సైతం ఇదే తీరిలో పార్టీ ప్రధాన కార్యాలయానికి వచ్చారు.

అసెంబ్లీ ఎన్నికల్లో పోటీ చేయటానికి సీటును ఆశిస్తున్న కొడుకును పార్టీ నేతల ముందు ఇంటర్వ్యూ నిర్వహించారు స్టాలిన్. సీరియస్ గా కాకున్నా.. సంప్రదాయానికి అనుగుణంగాసాగిన ఇంటర్వ్యూ మొత్తాన్ని పార్టీ నేతలంతా ఆసక్తిగా తిలకించారు. దీనికి సంబంధించిన ఫోటో ఒకటి ఇప్పుడు వైరల్ గా మారింది. ఈ మొత్తం సీన్ కాస్తంత సినిమాటిక్ గా ఉండొచ్చు. కానీ.. అధినేత ఎక్కడో రిమోట్ ప్లేస్ లో ఉండి.. ఎవరి పేరు ముందు టిక్ కొట్టి.. వారి పేరును డిసైడ్ చేసే దానితో పోలిస్తే..తమిళనాడులోని ప్రాంతీయ పార్టీలు కొన్ని అనుసరించే ఈ విధానం కాస్త బెటర్ గా అనిపించట్లేదు?