మైక్రోసాఫ్ట్ సహా ఐటీ కంపెనీలకు గ్రీన్ కార్డు షాక్

అమెరికాలోని విదేశీ ఉద్యోగులపై ట్రంప్ ప్రభుత్వం మరో కీలక నిర్ణయం తీసుకుంది. మైక్రోసాఫ్ట్ సహా పలు ప్రముఖ కంపెనీలకు గ్రీన్ కార్డుల కోసం విదేశీ ఉద్యోగులను స్పాన్సర్ చేసే అవకాశాన్ని తాత్కాలికంగా నిలిపివేసింది.

అమెరికా వైస్ ప్రెసిడెంట్ జేడీ వాన్స్ మైక్రోసాఫ్ట్ పై తీవ్ర ఆరోపణలు చేశారు. గత ఏడాది 6,000 మంది అమెరికన్ ఉద్యోగులను తొలగించిన సంస్థ, అదే సమయంలో 6,300 H1B వీసాలు, దాదాపు 3,000 గ్రీన్ కార్డుల ద్వారా విదేశీ ఉద్యోగులను నియమించుకుందని ఆయన అన్నారు.

విదేశీ ఉద్యోగులను అమెరికాలో శాశ్వతంగా కొనసాగించేందుకు కంపెనీలు అనుమతి పొందే కార్యక్రమం నుంచి మైక్రోసాఫ్ట్‌ను తొలగించినట్లు వాన్స్ వెల్లడించారు. అమెరికన్ ఉద్యోగులకు బదులుగా విదేశీ ఉద్యోగులను నియమించుకునే విధానాన్ని ప్రభుత్వం తీవ్రంగా పరిగణిస్తోంది.

మైక్రోసాఫ్ట్ తో పాటు అడోబ్, కాగ్నిజెంట్, ఇన్ఫోసిస్, టాటా, విప్రో, HCL, క్యాప్‌జెమినీ వంటి కంపెనీలపై కూడా చర్యలు తీసుకున్నారు. ఈ సంస్థలకు సంబంధించిన కొన్ని కేసులపై ఇప్పటికే ఫెడరల్ దర్యాప్తు జరుగుతోందని అధికారులు తెలిపారు.

2009 నుంచి ఈ కంపెనీలు దాదాపు 30 లక్షల మంది విదేశీ ఉద్యోగుల కోసం దరఖాస్తు చేసినట్లు అమెరికా కార్మిక శాఖ పేర్కొంది. ఇందులో 2.3 లక్షలకు పైగా H1B వీసాలు, 1 లక్షకు పైగా శాశ్వత లేబర్ సర్టిఫికేషన్లు ఉన్నాయని తెలిపింది.

ఇదే సమయంలో తొమ్మిది ప్రముఖ అమెరికా యూనివర్సిటీల్లో J1 వీసాల దుర్వినియోగంపై కూడా దర్యాప్తు ప్రారంభించినట్లు ప్రభుత్వం తెలిపింది. ఇందులో హార్వర్డ్, యేల్, స్టాన్‌ఫోర్డ్, MIT వంటి ప్రముఖ యూనివర్సిటీలు ఉన్నాయి.

అమెరికన్ ఉద్యోగులకు నష్టం కలిగించే విధానాలను మార్చేందుకే ఈ చర్యలు తీసుకుంటున్నామని వాన్స్ తెలిపారు. H1B వీసా విధానంలో ఉన్న లోపాలను సరిచేయాల్సిన అవసరం ఉందని, ఇందుకోసం కాంగ్రెస్ చర్యలు తీసుకోవాలని ఆయన కోరారు.