ఎట్టకేలకు ఇంటికెళ్ళిన ప్రశ్న రావణ్

ఏపీ సీఎం చంద్రబాబు, ఏపీ డిప్యూటీ సీఎం పవన్ కల్యాణ్, మంత్రి నారా లోకేశ్ పై ప్రశ్న రావణ్ వివాదాస్పద వ్యాఖ్యలు చేసిన నేపథ్యంలో అతడిపై పలు కేసులు నమోదైన సంగతి తెలిసిందే. అంతేకాదు, హిందూ మతాన్ని కించపరిచేలా రావణ్ పలు కాంట్రవర్షియల్ కామెంట్లు చేశారని సోషల్ మీడియాలో చాలామంది నెటిజన్లు రావణ్ అరెస్టును సమర్థిస్తున్నారు.

అయితే, రాజకీయ కక్షతోనే రావణ్ పై 30 కేసుల వరకు పెట్టారని విమర్శలు వస్తున్నాయి. ఒక కేసులో బెయిల్ వచ్చిన వెంటనే మరో కేసులో రావణ్ ను అరెస్ట్ చేస్తున్నారని ప్రకాష్ రాజ్ వంటి వారు విమర్శిస్తున్నారు.

ఈ క్రమంలోనే రావణ్ కు నాలుగో కేసులోనూ బెయిల్ మంజూరైంది. ఆ తర్వాత అతడిని పోలీసులు మరో కేసులో అరెస్టు చేయలేదు. దీంతో, రావణ్ తన లాయర్ జడ శ్రవణ్ కుమార్ తో మీడియాతో మాట్లాడారు. తనకు అండగా నిలిచిన మీడియా ప్రతినిధులకు, జడ్జిలకు, లాయర్ జడ శ్రవణ్ కు ధన్యవాదాలు తెలిపారు. అయితే, ఇంతకు మించి ఇప్పుడు తాను మాట్లాడలేనని, తర్వాత కూలంకషంగా ప్రెస్ మీట్ పెట్టి అన్ని విషయాలు మాట్లాడతానని మీడియా ప్రతినిధులకు రావణ్ తెలిపారు.

వాస్తవానికి, మూడు కేసుల్లో రావణ్ కు బెయిల్ ఇచ్చినా నాలుగో కేసు పెట్టడంతో కక్షపూరితంగా కేసులు పెడుతున్నారని విమర్శలు వచ్చాయి. అంతేకాకుండా, రావణ్ పై పోలీస్ స్టేషన్ ముందే జనసైనికులు దాడి చేసేందుకు ప్రయత్నించడం, పోలీసు వాహనాలపై కోడి గుడ్లు విసరడం, ఈ క్రమంలో పోలీసు అధికారులు కిందపడిపోవడం వంటి ఘటనలతో ప్రభుత్వంపై, హోం మినిస్టర్ అనితపై విమర్శలు వచ్చాయి.

ఈ నేపథ్యంలోనే రావణ్ ను మరో కేసులో అరెస్ట్ చేయలేదని టాక్. మరి, ఇకనైనా రావణ్ తన భాష మార్చుకొని విశ్లేషణాత్మక విమర్శలు చేస్తారా…లేక గతంలో మాదిరిగానే వివాదాస్పద వ్యాఖ్యలు కంటిన్యూ చేస్తారా అన్నది తేలాల్సి ఉంది.