హైకోర్టు తీర్పుపై సుప్రీం కోర్టుకు ఏపీ సర్కార్?

ఏపీలో త్వరలో జరగాల్సి ఉన్న స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పించేలా జారీ అయిన జీవోలను ఏపీ హైకోర్టు కొట్టి వేసిన సంగతి తెలిసిందే. ఆ ఎన్నికల్లో బీసీలకు 34 శాతం రిజర్వేషన్ కల్పించేలా జారీ చేసిన జీవో నంబర్ 105, జీవో నంబర్ 1065 సుప్రీం కోర్టు తీర్పునకు విరుద్ధంగా ఉన్నాయని హైకోర్టు వాటిని కొట్టివేసింది. ఈ నేపథ్యంలోనే హైకోర్టు తీర్పును సుప్రీం కోర్టులో సవాల్ చేయాలని ఏపీ సర్కార్ భావిస్తోందని తెలుస్తోంది.

ఈ ప్రకారం సంబంధిత అధికారులకు ఏపీ సీఎం చంద్రబాబు ఆదేశాలు కూడా జారీ చేశారని తెలుస్తోంది. హైకోర్టు ఇచ్చిన తీర్పును మరియు జీవోల రద్దును వ్యతిరేకిస్తూ సుప్రీంకోర్టులో స్పెషల్ లీవ్ పిటిషన్ దాఖలు చేసేందుకు ప్రభుత్వం చర్యలు చేపట్టిందని తెలుస్తోంది. బీసీ రిజర్వేషన్ల కొనసాగింపు అంశాన్ని దేశపు అత్యున్నత న్యాయస్థానంలో తేల్చుకోవాలని చంద్రబాబు సర్కార్ నిర్ణయించుకుందని తెలుస్తోంది.

దేశంలో మొత్తం రిజర్వేషన్లు ఎట్టి పరిస్థితుల్లోనూ 50 శాతానికి మించకూడదని సుప్రీంకోర్టు ఇందిరా సాహ్ని కేసు(1992) విచారణ సందర్భంగా ఇచ్చిన చరిత్రాత్మక తీర్పులో స్పష్టం చేసింది. స్థానిక సంస్థల్లో కూడా ఎస్సీ, ఎస్టీ, బీసీ రిజర్వేషన్లు అన్నీ కలిపి ఈ 50 శాతం సీలింగ్ దాటకూడదని తేల్చి చెప్పింది. అయితే, ఏపీలో బీసీలకు 34 శాతం రిజర్వేషన్లు ఇస్తే ఎస్సీ, ఎస్టీ కోటాలతో కలిపి మొత్తం రిజర్వేషన్లు సుమారు 59 శాతం అవుతున్నాయి. ఇది సుప్రీంకోర్టు నిబంధనలకు విరుద్ధమని హైకోర్టు తన తీర్పులో పేర్కొంది.