సుహాస్ తప్పుకుంది అందుకేనేమో

కెరీర్ ప్రారంభంలో ఎగబడి వస్తున్నాయని తొందరపడి ఆఫర్లన్నీ ఒప్పేసుకుంటే వాటి ప్రభావం తర్వాత ఎప్పుడో ఉంటుంది. ముఖ్యంగా టాలెంట్ ఉన్న కుర్ర హీరోల జాగ్రత్తగా ఉండాలి. అర్జున్ రెడ్డి రిలీజయ్యాక విజయ్ దేవరకొండ ఇమేజ్ చూసి ఎక్కడో ల్యాబులో మూలానపడిన ఏ మంత్రం వేశావే కేవలం బిజినెస్ కోసం బయటికి తీసుకొచ్చిన ఉదంతం అభిమానులు మర్చిపోలేరు. సుహాస్ కు సైతం ఇది అనుభవమవుతోంది. అందరూ దేవర హడావిడిలో పడ్డారు కానీ మొన్న శనివారం గొర్రె పురాణం రిలీజైన సంగతి చాలా మంది పట్టించుకోలేదు. అసలు వచ్చిందనే విషయమే తెలియకుండా జరిగింది.

ట్రైలర్ లాంచ్ తో మొదలుపెట్టి విడుదల తేదీ దాకా సుహాస్ ఎక్కడా దీని ప్రమోషన్లలో పాల్గొనలేదు. రెండు మతాల మధ్య దోబూచులాటకు కారణమైన ఒక గొర్రెకు, జైల్లో ఖైదీకి ముడిపెట్టిన విధానం వినడానికి వైరెటీగా ఉన్నా తెరకెక్కించే క్రమంలో పడిన తడబాటు భరించలేని ప్రహసనంగా మారింది. అసలే పబ్లిసిటీ లేక ఓపెనింగ్స్ రాలేదని ఒకపక్క నిర్మాత ఇదవుతుంటే టాక్ కూడా అంతంత మాత్రంగా ఉండటం ఫలితాన్ని డిజాస్టర్ గా మార్చేసింది. ఆ మధ్య శ్రీరంగనీతులుకు సైతం సుహాస్ కి ఇదే అనుభవం ఎదురయ్యింది. ఓటిటిలో వచ్చేదాకా ఎవరికీ దాని ఊసే లేదు.

వచ్చే దసరాకు రాబోతున్న జనక అయితే గనక మీద సుహాస్ కు బోలెడు ఆశలున్నాయి. ఓవర్సీస్ హక్కులను కొన్నాడంటేనే నమ్మకం ఏ స్థాయిలో ఉందో అర్థం చేసుకోవచ్చు. పైగా దిల్ రాజు పిల్లలు నెలకొల్పిన బ్యానర్. సో మార్కెటింగ్ బ్రహ్మాండంగా జరుగుతుంది. ఇలాంటి మూవీ వస్తున్న టైంలో గొర్రె పురాణం రావడం కరెక్ట్ కాదని భావించాడో లేక ఎలాగూ కంటెంట్ ఎలా ఉందో అర్థమై దూరంగా ఉన్నాడో తెలియదు. ఇవి కాకుండా ఇతరత్రా కారణాలు ఏమైనా ఉన్నాయేమో లోగుట్టు పెరుమాళ్ళకెరుక. దీని తర్వాత తర్వాతి వరసలో కేబుల్ రెడ్డి, ఉప్పు కప్పురంబు, ఆనంద్ రావు అడ్వెంచర్స్ విడుదలకు రెడీ అవుతున్నాయి.