హంపీ నేపథ్యంలో రష్మిక మందన్న హారర్ సినిమా

బాలీవుడ్ లో హారర్ ట్రెండ్ జోరుగా ఉంది. దెయ్యాలతో కాసింత కామెడీ చేయించి రవ్వంత భయపెడితే చాలు ప్రేక్షకులు కలెక్షన్లు కురిపిస్తున్నారు. ముప్పై కోట్లతో తీసిన ముంజ్యా వంద కోట్లకు పైగా రాబడితే అసలు స్టార్లే లేని స్త్రీ 2 ఏకంగా అయిదు వందల కోట్ల వైపు పరుగులు పెడుతోంది. హాస్యం లేకపోయినా అజయ్ దేవగన్ సైతాన్ సైతం బ్లాక్ బస్టర్ అందుకుంది. ఈ నేపథ్యంలో మరికొన్ని హారర్ మూవీస్ తెరకెక్కబోతున్నాయి. వాటిలో రష్మిక మందన్న ఒకటి చేస్తుండటం విశేషం. అక్టోబర్ నుంచి షూటింగ్ మొదలుపెట్టే ప్లాన్ లో ఉన్న ఈ సినిమా విశేషాలేంటో చూద్దాం.

వాంపైర్స్ అఫ్ విజయ నగర పేరుతో రూపొందే ఈ హారర్ డ్రామాకు ఆదిత్య సర్పోద్తర్ దర్శకత్వం వహించబోతున్నాడు. కర్ణాటకలో సుప్రసిద్ధి చెందిన పర్యాటక క్షేత్రం హంపీ బ్యాక్ డ్రాప్ లో ఇప్పటి దాకా ఎవరూ చూపించని సరికొత్త కథలను దీని ద్వారా వెలికి తీస్తారట. హీరోగా రాజ్ కుమార్ రావు నటించబోతున్నట్టు తెలిసింది. రష్మిక పాత్రకు చాలా షేడ్స్ ఉంటాయని అంటున్నారు. విజయ నగర సామ్రాజ్య చరిత్రతో మొదలుపెట్టి వర్తమానం దాకా విభిన్నమైన కాలమానాలు ఇందులో ఉంటాయని సమాచారం. 14వ శతాబ్దాపు నేపథ్యం కాబట్టి బడ్జెట్ గట్రా భారీగా ఉండబోతోంది.

సౌత్ లో ఎంత డిమాండ్ ఉన్నా హిందీ అవకాశాలు మాత్రం రష్మిక వదలడం లేదు. డిసెంబర్ 6 తన రెండు సినిమాలు పుష్ప 2 ది రూల్, చావా ఒకే రోజు రిలీజ్ కాబోతున్నాయి. ధనుష్, నాగార్జునతో చేసిన కుబేర షూటింగ్ కీలక దశలో ఉంది. రాహుల్ రవీంద్రన్ దర్శకత్వం వహిస్తున్న ది గర్ల్ ఫ్రెండ్ ఈ ఏడాదే ప్లాన్ చేస్తున్నారు. సల్మాన్ ఖాన్ సరసన సికందర్ లో ఛాన్స్ కొట్టేయడం రష్మికకు మరో జాక్ పాట్. సందీప్ రెడ్డి వంగా యానిమల్ చేశాక శ్రీవల్లి రేంజ్ ఎక్కడికో వెళ్లిపోయింది. తెలుగు తమిళ ఛాన్సులను బాలన్స్ చేసుకుంటూనే హిందీ ఆఫర్లు వస్తే మాత్రం వీలైనంత నో చెప్పడం లేదట.