ఇండియన్-2.. ఇది మామూలు డిజాస్టర్ కాదు

ఇండియన్-2.. కొన్ని వారాల ముందు వరకు పాన్ ఇండియా స్థాయిలో మోస్ట్ అవైటెడ్ మూవీస్‌లో ఒకటిగా భావించిన సినిమా. కానీ రిలీజ్ టైంకి ఈ చిత్రానికి సొంత భాష తమిళ సహా ఎక్కడా పెద్దగా హైప్ కనిపించలేదు. అయినా సరే.. శంకర్, కమల్ హాసన్ లాంటి కాంబినేషన్లో వందల కోట్లు పెట్టి తీసిన సినిమా అంటే ఏదో ఒక ప్రత్యేకత ఉండే ఉంటుందని అనుకున్నారు ప్రేక్షకులు. ఆ నమ్మకంతోనే థియేటర్లకు వెళ్లిన వారికి చుక్కలు కనిపించాయి. కంటెంట్ లేకుండా ఊరికే సాగదీసి మూడు గంటల పాటు ప్రేక్షకులను విసిగించేశాడు శంకర్.

దీంతో తొలి రోజు ఉదయం నుంచే నెగెటివ్ టాక్ తప్పలేదు. ఆ ప్రభావం వసూళ్ల మీద కూడా బాగానే పడింది. వీకెండ్లోనే ఈ చిత్రం నిలబడలేకపోయింది. ఆదివారం రోజు తెలుగు రాష్ట్రాల్లో ఆక్యుపెన్సీ 30 శాతం లోపే ఉండడం ఇందుకు గమనార్హం. తమిళనాడు సహా ఎక్కడా కూడా సినిమా పెద్దగా ప్రభావం చూపలేదు.

వీకెండ్ అయ్యాక ‘ఇండియన్-2’ పరిస్థితి ఘోరంగా తయారైంది. మినిమం ఆక్యుపెన్సీలు లేక బాక్సాఫీస్ దగ్గర దుర్భర పరిస్థితులు ఎదుర్కొంటోంది ఈ చిత్రం. వరల్డ్ వైడ్ సోమవారం అన్ని భాషల్లో కలిపి కూడా సినిమాకు పది కోట్ల గ్రాస్ రాని పరిస్థితి. తమిళనాడులో సోమవారం 2 కోట్ల గ్రాస్ కూడా వసూలు కాలేదు. ఆక్యుపెన్సీ కూడా 20 శాతం కూడా లేని పరిస్థితి. తెలుగు రాష్ట్రాల్లో ‘ఇండియన్-2’ పరిస్థితి ఇంకా దయనీయంగా ఉంది. ఏపీలో కానీ, తెలంగాణలో కానీ విడివిడిగా కోటి రూపాయల గ్రాస్ కూడా రాలేదు. వీకెండ్ తర్వాత తెలుగు ఆడియన్స్ పూర్తిగా ఈ చిత్రాన్ని లైట్ తీసుకున్నారు.

ఇక నార్త్ ఇండియాలో అయితే ఈ సినిమాను థియేటర్లలో నడిపిస్తే షేర్ అంటూ ఏమీ వచ్చేలా లేదు. మెయింటైనెన్స్ ఖర్చులకు కూడా డబ్బులు రాని పరిస్థితి. విదేశాల్లో కూడా ‘ఇండియన్-2’ పరిస్థితి ఘోరంగానే ఉంది. మొత్తంగా చూస్తే ‘ఇండియన్-2’ను ప్రేక్షకులు పూర్తిగా తిరస్కరించారని, ఇది ఆల్ టైం డిజాస్టర్లలో ఒకటిగా నిలవబోతోందని స్పష్టమవుతోంది.