‘వి’ డబ్బులు వెనక్కి ఇమ్మంటున్నారట!

నాని హీరో, దిల్‍ రాజు నిర్మాత, ఇంద్రగంటి మోహనకృష్ణ దర్శకుడంటే ఆ సినిమా బాగోదని ఎవరు అనుకుంటారు? అందులోను నాని ఇరవై అయిదవ చిత్రం కనుక ఖచ్చితంగా స్పెషల్‍గా వుంటుందని, ఇంత పెద్ద సినిమాను ఓటిటి ద్వారా విడుదల చేస్తే అమెజాన్‍ ప్రైమ్‍ యూజర్‍ డాటాబేస్‍ అమాంతం పెరిగిపోతుందని భావించి ‘వి’ రైట్స్ను అమెజాన్‍ భారీ రేటిచ్చి సొంతం చేసుకుంది. థియేట్రికల్‍గా విడుదల చేసి, సినిమా హిట్టయితే ఎంత లాభం వస్తుందో అదే స్థాయి లాభం కనిపించే సరికి దిల్‍ రాజు కూడా ‘వి’ డిజిటల్‍ రిలీజ్‍కి ఓకే చెప్పేసాడు.

అయితే అమెజాన్‍ అనుకున్నది ఒకటి అయితే, జరిగింది మరొకటి. వి సినిమా బాలేదనే టాక్‍ మొదటి ఆటతోనే మొదలైపోవడంతో ఈ సినిమాకి ఆశించిన స్పందన రాలేదు. ఇక డిజిటల్‍ రిలీజ్‍ అంటే పైరసీ బెడద వుండనే వుంటుంది. సినిమా బాగుందనే టాక్‍ వస్తే ఖచ్చితంగా చాలా మంది సభ్యత్వం తీసుకుని వుండేవాళ్లు. ఏ విధమయిన లాభం జరగకపోవడంతో ఇలాంటి సబ్‍స్టాండర్డ్ ప్రోడక్ట్ అంత రేటుకి అమ్మడం తగదని, భవిష్యత్తులో సంబంధాలు మెరుగ్గా వుండాలంటే కొంత మొత్తం తిరిగి ఇవ్వాలని అమెజాన్‍ నుంచి డిమాండ్‍ చేస్తున్నారట.

దిల్‍ రాజు నుంచి ఇంకా స్పందన ఏదీ రాలేదు కానీ ఒత్తిడి పెరిగితే మాత్రం తప్పక కొంత వెనక్కు ఇవ్వాల్సి వుంటుంది. డిజిటల్‍ రిలీజ్‍ చేస్తే ఫ్లాపయినపుడు బయ్యర్ల మాదిరిగా ఒత్తిళ్లు వుండవనుకునే నిర్మాతలకు ఇది కొత్త షాక్‍ అనుకోవచ్చు.