పుష్పకు శాపం.. దేవరకు వరం

ఈ ఏడాది మోస్ట్ అవైటెడ్ మూవీస్‌లో ఒకటైన ‘పుష్ప-2’ ముందు ప్రకటించినట్లు ఆగస్టు 15న విడుదల కాదన్న ప్రకటన దేశవ్యాప్తంగా సినీ ప్రియులను నిరాశకు గురి చేసింది. ఇప్పటికే ఆ సినిమా కోసం చాలా కాలంగా ఎదురు చూస్తున్నారు. ఇప్పుడు ఇంకో నాలుగు నెలలు అదనంగా నిరీక్షించాల్సి వస్తోంది. ‘పుష్ప-2’ వాయిదా వల్ల చాలా సినిమాల షెడ్యూళ్లు తారుమారు అయ్యాయి. ‘పుష్ప-2’ బడ్జెట్, బిజినెస్ మీద కూడా వాయిదా నిర్ణయం తీవ్ర ప్రభావం చూపింది.

అదే సమయంలో వేరే సినిమాలు కొన్నింటికి ‘పుష్ప-2’ వాయిదా నిర్ణయం ప్లస్ అవుతోంది. క్రేజీ డేట్‌ అయిన ఆగస్ట్ 15ను వాడేసుకోవడానికి ‘డబుల్ ఇస్మార్ట్’ లాంటి చిత్రాలు కర్చీఫ్ వేసేస్తున్నాయి. మరోవైపు ‘పుష్ప-2’ వాయిదా నిర్ణయం జూనియర్ ఎన్టీఆర్ సినిమా ‘దేవర’ క్రేజ్, బిజినెస్‌ను పెంచిందన్నది ట్రేడ్ వర్గాల సమాచారం.

ఈ నెల చివర్లో ‘కల్కి’ లాంటి బారీ చిత్రం వచ్చాక భారతీయ ప్రేక్షకుల దృష్టంతా ‘పుష్ప-2’ మీదే ఉండేది. కానీ ఆ సినిమా వాయిదా పడడంతో ప్రేక్షకుల ఫోకస్ ‘దేవర’ మీదికి మళ్లనుంది. మధ్యలో ‘ఇండియన్-2’ లాంటి పెద్ద సినిమా ఉన్నా సరే.. మాస్ దృష్టిని ఎక్కువగా ఆకర్షించేది ‘దేవర’నే. తెలుగు రాష్ట్రాల్లో ఇప్పటికే ఈ చిత్రానికి బంపర్ క్రేజ్ ఉంది. ఇప్పుడు అది మరింత పెరిగింది. రిలీజ్ టైంకి పాన్ ఇండియా స్థాయిలో ఈ చిత్రానికి క్రేజ్ పెరుగుతుందని అంచనా వేస్తున్నారు.

విడుదలకు ఇంకా వంద రోజులు ఉండగానే ‘దేవర’ బిజినెస్ మొత్తం క్లోజ్ అయిపోవడం విశేషం. ముందు అనుకున్న దాని కంటే ఎక్కువ రేట్లకే ఈ సినిమాను కొన్నారు బయ్యర్లు. తెలుగు రాష్ట్రాల వరకే ‘దేవర’ థియేట్రికల్ హక్కులు రూ.120 కోట్ల మేర అమ్ముడవడం విశేషం. ఓవరాల్ థియేట్రికల్ బిజినెస్ రూ.200 కోట్ల మార్కును టచ్ చేస్తోంది.