త్వరగా ఇంటికొస్తున్న ఫ్యామిలీ స్టార్

కొండంత ఆశలు మోసుకొచ్చి నిరాశపరిచిన ది ఫ్యామిలీ స్టార్ కేవలం 21 రోజులకే ఓటిటిలో రానుండటం షాక్ కలిగించే విషయం. ఎంత డిజాస్టరైనా కనీసం నాలుగు వారాల గ్యాప్ మెయింటైన్ చేస్తున్న తరుణంలో ఇంకా కొద్దోగొప్పో థియేటర్లలో ఆడుతుండగానే డిజిటల్ లోకి వచ్చేయడం తీవ్రమైన షాక్ కాదు కానీ అనూహ్యమే. ఏప్రిల్ 26 అంటే రేపటి నుంచి అమెజాన్ ప్రైమ్ లో దీన్ని చూడొచ్చని లేటెస్ట్ అప్డేట్. సదరు సంస్థ అఫీషియల్ ఎక్స్ హ్యాండిల్ లో దీని గురించి ఎలాంటి అధికారిక ప్రకటన లేదు కానీ హఠాత్తుగా కొత్త సినిమాలను అర్ధరాత్రి స్ట్రీమింగ్ చేయడం ప్రైమ్ కు కొత్తేమీ కాదు.

నిజానికి మే 3న వస్తుందని గత వారం లీక్ వచ్చింది. ఇప్పుడు ఒక వారం ముందుకు జరపడంలో ఆంతర్యం ఏమిటనే సందేహం రావొచ్చు. ఇన్ సైడ్ టాక్ ప్రకారం సాధారణంగా ప్రైమ్ అగ్రిమెంట్ చేసుకున్న టైం కన్నా ముందుగా రిలీజ్ చేసే అవకాశం ఉంటే ఎక్కువ మొత్తం ఆఫర్ చేసి ఒప్పందాన్ని మార్చుకుంటుంది. స్టార్ హీరోల సినిమాలు ఫ్లాప్ అయిన సందర్భాల్లో ఇది ఎక్కువగా ఉపయోగపడుతుంది. ఇప్పటికే ది ఫ్యామిలీ స్టార్ నష్టాలు గుదిబండగా మారిన తరుణంలో దాన్ని బాగా తగ్గించుకోవాలంటే ఇదొక్కటే మార్గం. అందుకే దిల్ రాజు ఎర్లీ ప్రీమియర్ కు ఎస్ చెప్పారని వినికిడి.

నెట్ ఫ్లిక్స్ లో టిల్లు స్క్వేర్ వస్తున్న రోజే ప్రైమ్ ఇలా ది ఫ్యామిలీ స్టార్ ని దింపడం పోటీ వ్యూహంలో భాగమని విశ్లేషకులు అంటున్నారు. ఇటీవలి కాలంలో కంటెంట్ పరంగా ప్రైమ్ కొంత వెనుకబడింది. తెలుగు తమిళ చిత్రాలను నెట్ ఫ్లిక్స్ భారీ రేట్లు పెట్టి వరసగా కొనేయడం ఇబ్బందిగా పరిణమించింది. అందుకే ఈ కాంపిటీషన్ ఎదురుకోవడానికి అమెజాన్ వేస్తున్న స్ట్రాటజీల్లో భాగంగా ఇలా సెట్ చేస్తున్నారనే కామెంట్లో నిజం లేకపోలేదు. పరశురామ్ దర్శకత్వం వహించిన ది ఫ్యామిలీ స్టార్ సగానికి పైగానే పెట్టుబడి నష్టం మిగిల్చింది. కొత్త సినిమాలతో ఈ వారం ఓటిటి లవర్స్ కి పండగే.