కల్కి పరిశీలనలో కొత్త డేట్

అంతా అనుకున్న ప్రకారం జరిగితే ఈ పాటికి ప్రభాస్ మెగా మూవీ ‘కల్కి 2898 ఏడీ’ విడుదలకు కౌంట్ డౌన్ నడుస్తుండాలి. ఇంకో రెండు వారాల్లోనే సినిమా రిలీజ్ కావాల్సింది. కానీ పోస్ట్ ప్రొడక్షన్ పనుల్లో ఆలస్యానికి తోడు ఎన్నికలు, ఐపీఎల్ హడావుడి కారణంగా మే 9న ఈ చిత్రాన్ని రిలీజ్ చేయడం కష్టమని భావించి ‘కల్కి’ని వాయిదా వేసేసింది. కానీ ఈ విషయం ఇంకా అధికారికంగా ప్రకటించలేదు. కొత్త డేట్ ఎంచుకున్నాక నేరుగా ఫలానా తేదీన రిలీజ్ అని ప్రకటించాలని చూస్తున్నారు. కానీ ఆ విషయంలో ఎంతకీ ఒక నిర్ణయానికి రాలేకపోతోంది టీం.

కల్కి రిలీజ్ డేట్‌తో చాలా విషయాలు ముడిపడి ఉండడమే అందుక్కారణం. ఓవైపు బయ్యర్లు ఓ డేట్ చెబుతుంటే.. ఇంకోవైపు ఆల్రెడీ డిజిటిల్ రైట్స్ తీసుకున్న సంస్థ ఫలానా టైంలో రిలీజ్ చేయాలని కండిషన్ పెడుతోందట. టీంలోనూ రిలీజ్ డేట్ విషయంలో భిన్నాభిప్రాయాలు ఉన్నట్లు తెలుస్తోంది.

ఐతే రకరకాల అంశాలను పరిశీలించాక ఓ కొత్త డేట్‌ను కల్కి టీం సీరియస్‌గా పరిశీలిస్తున్నట్లు సమాచారం. జూన్ 27న ‘కల్కి’ని ప్రేక్షకుల ముందుకు తీసుకొచ్చే అవకాశాలున్నట్లు తాజా సమాచారం. బయ్యర్లేమో మే చివర్లోనే సినిమాను రిలీజ్ చేసేయాలని.. వేసవి సీజన్‌ను వృథా చేసుకోవద్దని అంటుంటే.. ఆ సమయానికి సినిమాను రెడీ చేయడం కష్టమన్న ఉద్దేశంతో జూన్ చివరి వారం మీద టీం ఫోకస్ పెట్టిందట. దాదాపుగా ఇదే డేట్ ఖరారు కావచ్చని అంటున్నారు. మరి కొన్ని రోజుల్లోనే ఈ విషయంపై ఫైనల్ కాల్ తీసుకుని కొత్త డేట్ అనౌన్స్ చేస్తారట.

‘కల్కి’ షూటింగ్ ఇప్పటికే పూర్తి కాక విదేశాల నుంచి రావాల్సిన వీఎఫెక్స్ కంటెంట్ కోసం టీం ఎదురు చూస్తోంది. అది సంతృప్తికరంగా ఉంటే పోస్ట్ ప్రొడక్షన్ పనులు కూడా ఒక కొలిక్కి వచ్చేస్తాయి. జూన్ మధ్యకల్లా ఫస్ట్ కాపీ రెడీ కావచ్చని.. ప్రమోషన్లు అవీ చేసుకుని నెలాఖరులో సినిమాను ప్రేక్షకుల ముందుకు తేవాలని టీం చూస్తోందట.