రాశి-త‌మ‌న్నా గ్లామ‌ర్ ఎటాక్

తెలుగులో అవ‌కాశాలు త‌గ్గిపోయిన ఒక‌ప్ప‌టి స్టార్ హీరోయిన్లు త‌మ‌న్నా, రాశి ఖ‌న్నా ఇప్పుడు త‌మిళంలో అదృష్టాన్ని ప‌రీక్షించుకుంటున్నారు. వీళ్లిద్ద‌రూ క‌లిసి చేసిన త‌మిళ సినిమా.. ఆర‌ణ్మ‌యి-4. త‌మిళ సీనియ‌ర్ ద‌ర్శ‌కుడు సుంద‌ర్.సి రూపొందించిన చిత్ర‌మిది. ఆయ‌న దాదాపు ద‌శాబ్ద కాలం నుంచి హార్రర్ కామెడీ జాన‌ర్లో ఆర‌ణ్మ‌యి, ఆర‌ణ్మ‌యి-2, ఆర‌ణ్మ‌యి-3.. ఇలా సినిమాలు తీస్తూ వ‌స్తున్నారు. అవి ఓ మోస్త‌రుగా ఆడి వెళ్లిపోతున్నాయి. ఈసారి కూడా ఆయ‌న ఆర‌ణ్మ‌యి ఫ్రాంఛైజీనే న‌మ్ముకుని ఇంకో సినిమా తీశారు.

పార్ట్-3లో క‌థానాయిక‌గా న‌టించిన రాశి ఖ‌న్నాను కొన‌సాగిస్తూ.. ఈసారి మ‌రో గ్లామ‌ర్ క్వీన్ త‌మ‌న్నాను కూడా ఈ సినిమాలోకి తీసుకొచ్చారు. ఈ నెల 26న ఆర‌ణ్మ‌యి-4 ప్రేక్ష‌కుల ముందుకు రానుంది.

త‌మ‌న్నా, రాశి తెలుగులో కూడా బాగానే పాపుల‌ర్ కాబ‌ట్టి ఈ చిత్రాన్ని తెలుగులో కూడా విడుద‌ల చేయ‌బోతున్నారు. ఏషియ‌న్ మూవీస్ సంస్థ హ‌క్కులు తీసుకుంది. ఈ చిత్రానికి తెలుగులో బాక్ అని చిత్ర‌మైన టైటిల్ ఏదో పెట్టారు. దానికి అర్థ‌మేంటో సినిమా చూస్తే కానీ తెలియ‌దేమో. ఈ మ‌ధ్య త‌మిళ అనువాద చిత్రాల‌కు త‌మిళ టైటిళ్లే పెట్టి వ‌దిలేస్తున్నారు. అలా కాకుండా ఏదో కొత్త టైటిల్ పెట్టినందుకు సంతోషించాల్సిందే.

ఆర‌ణ్మ‌యి మూడు పార్టుల్లోనూ వేరే హీరోల‌ను పెట్టి తాను కీల‌క పాత్ర‌లు పోషించిన సుంద‌ర్.. ఈ చిత్రంలో త‌నే హీరోగా న‌టించ‌డం విశేషం. ఈ చిత్రంలో తెలుగు క‌మెడియ‌న్ వెన్నెల కిషోర్ కూడా ఒక పాత్ర‌లో క‌నిపించ‌నున్నాడు. మిగ‌తా త‌మిళ ఆర్టిస్టుల్లో కూడా కొంద‌రు మ‌న‌వాళ్ల‌కు తెలిసిన వాళ్లే. హిప్‌హాప్ త‌మిళ ఈ చిత్రానికి సంగీతం అందిస్తున్నాడు.