అమెరికాలో టిల్లు ప్రకంపనలు

తెలుగు ప్రేక్షకులందు అమెరికన్ ఎన్నారై తెలుగు ఆడియన్స్ వేరు. వాళ్లు ఎప్పుడు ఏ సినిమాకు పట్టం కడతారో అర్థం కాదు. కొన్నిసార్లు పెద్ద స్టార్ల సినిమాలను కూడా పట్టించుకోరు. అదే సమయంలో చిన్న హీరోలు నటించిన చిత్రాలకు కూడా భారీ వసూళ్లు కట్టబెడతారు. సంక్రాంతి టైంలో ‘గుంటూరు కారం’ను లైట్ తీసుకుని ‘హనుమాన్’ సినిమాకు భారీ వసూళ్లు అందించారు. తెలుగు రాష్ట్రాల్లో కూడా అదే ట్రెండ్ నడిచినా.. అక్కడ అంతరం చాలా ఎక్కువ ఉంది.

సంక్రాంతి తర్వాత యుఎస్‌లో ‘గామి’ అనే చిన్న సినిమా మినహా ఏదీ పెద్దగా ప్రభావం చూపలేదు. కానీ ఇప్పుడు ‘టిల్లు స్క్వేర్’ మూవీకి అక్కడ బ్రహ్మరథం పడుతున్నారు. ఈ చిత్రానికి ముందు నుంచి క్రేజ్ ఉన్న మాట వాస్తవమే కానీ.. ప్రిమియర్స్ దగ్గర వచ్చిన రెస్పాన్స్ మాత్రం అసాధారణం. ఏకంగా 4 లక్షల డాలర్లకు పైగా ప్రిమియర్ కలెక్షన్లు అంటే మామూలు విషయం కాదు. పెద్ద పెద్ద స్టార్లకు మాత్రమే ఈ స్థాయిలో ప్రిమియర్ వసూళ్లు వస్తుంటాయి. ఇక తొలి రోజు సైతం ప్రేక్షకులు సినిమా చూసేందుకు ఎగబడ్డారు. దీంతో ప్రిమియర్స్, డే-1 వసూళ్లు కలిపి మిలియన్ డాలర్ల మార్కును టచ్ చేసింది ఈ చిత్రం. ‘టిల్లు స్క్వేర్’ సినిమా స్థాయికి ఇది చాలా పెద్ద నంబర్.

వీకెండ్లో దూకుడు కొనసాగిస్తున్న ‘టిల్లు స్క్వేర్’ 2 మిలియన్ మార్కును టచ్ చేయడానికి ఎంతో సమయం పట్టకపోవచ్చు. మిడ్ రేంజ్ మూవీస్‌లో అత్యంత వేగంగా ఈ మార్కును అందుకున్న చిత్రాల్లో ఒకటిగా నిలవబోతోంది ‘టిల్లు స్క్వేర్’. ఇక ఈ చిత్రం ఓవరాల్‌గా వీకెండ్ అయ్యేసరికే అన్ని ఏరియాల్లో బ్రేక్ ఈవెన్ మార్కును దాటేయబోతోంది. బయ్యర్లందరూ భారీ లాభాలు ఖాతాలో వేసుకోబోతున్నారు.