పెళ్లి ప్రపోజల్ పెట్టింది గోపీనేనట

టాలీవుడ్ మాచో హీరో గోపీచంద్ ముందు సినీ రంగంతో సంబంధం లేని అమ్మాయిని పెళ్లి చేసుకోవాలనుకున్నాడు. కొన్ని కారణాల వల్ల అది సాధ్యం కాలేదు. ఆ తర్వాత అతను శ్రీకాంత్ మేనకోడలు రేష్మను వివాహం చేసుకున్నాడు. ఇప్పుడు గోపీకి ఇద్దరు కొడుకులు. రేష్మను పెళ్లి చేసుకునే విషయంలో అడుగు వేసింది గోపీనేనట. చాలా సిగ్గరిగా కనిపించే గోపీ తనకు తానుగా పెళ్లి ప్రపోజల్ పెట్టాడంటే ఆశ్చర్యం కలగక మానదు. ఈ విషయాన్ని కమెడియన్ ఆలీ నిర్వహించే టాక్ షోలో గోపీనే స్వయంగా వెల్లడించాడు.

“సినిమాల పరంగా నాకు అప్పటికే శ్రీకాంత్ గారితో పరిచయం ఉంది. ఆయన మేనకోడలు రేష్మ ఫొటో ఒకసారి అనుకోకుండా చూశా. తనను పెళ్లి చేసుకోవాలనుకున్నా. ఐతే పెళ్లి గురించి ఆయనతో ఎలా మాట్లాడాలో అర్థం కాలేదు. చలపతిరావు గారితో ఈ విషయం చెప్పా. ‘కంగారు పడకు. నేను మాట్లాడతా’ అని ఆయనే శ్రీకాంత్ గారితో మాట్లాడి అన్నీ ముందుండి నడిపించారు. అలా మా పెళ్లి జరిగింది. పెళ్లి ఫిక్స్ అయ్యాక రేష్మ నాకు టీషర్ట్, గ్రీటింగ్ కార్డ్ గిఫ్టుగా పంపింది” అని గోపీచంద్ వెల్లడించాడు.

ఇక తన కుటుంబం గురించి మాట్లాడుతూ.. “మా చెల్లెలు డెంటిస్ట్. బావ సాఫ్ట్‌వేర్ ఇంజినీర్. వాళ్లకు ఇద్దరు కుమార్తెలు. హైదరాబాద్‌లోనే ఉంటున్నారు. అమ్మ నాతోనే ఉంటుంది. నాకు ఇద్దరు కొడుకులు. పెద్దవాడికి పదేళ్లు. చిన్నవాడికి ఐదేళ్లు. నటుడిగా నా వారసత్వాన్ని ఎవరు కొనసాగిస్తారో తెలయిదు. పెద్దవాడు సినిమాలు బాగా చూస్తాడు. నా సినిమాలపై విశ్లేషణలు కూడా చేస్తాడు. ఇక్కడ ఎందుకలా చేశావ్.. అక్కడ ఎందుకలా నటించావ్ అని అడుగుతుంటాడు. నేను వాళ్ల కెరీర్ల విషయంలో ఒత్తిడి చేయదలుచుకోలేదు. కానీ ఒక్కరినైనా మా నాన్న లాగా దర్శకుడిని చేయాలని ఉంది” అని గోపీ తెలిపాడు.