ఫిబ్రవరి 2 – చిన్న సినిమాల యుద్ధం

సంక్రాంతి సందడి అయ్యాక బాక్సాఫీస్ కు పదిహేను రోజుల గ్యాప్ వచ్చేసింది. రిపబ్లిక్ డేకి రిలీజైన వాటిలో కెప్టెన్ మిల్లర్ నిరాశ పరచగా, ఆయలాన్ చివరి నిమిషంలో షోలు రద్దయి ఉన్న ఆసక్తిని తగ్గించింది. ఏవో లీగల్ ఇష్యూస్ అన్నారు కానీ మళ్ళీ ఎప్పుడు వస్తుందో క్లారిటీ లేదు. ఈ శుక్రవారం ఫిబ్రవరి 2 ఒకటి రెండు కాదు ఏకంగా ఎనిమిది చిన్న సినిమాలు నువ్వా నేనా అంటూ యుద్ధానికి సిద్ధ పడుతున్నాయి. బజ్ ఉన్న వాటిలో ముందుగా చెప్పుకోవాల్సింది సుహాస్ హీరోగా చేసిన ‘అంబాజీపేట మ్యారేజీ బ్యాండు’ గురించి. ట్రైలర్ వచ్చాక దీని మీద ఆడియన్స్ లో మెల్లగా ఆసక్తి పెరిగింది.

క్రమం తప్పకుండ ప్రమోషన్లతో పాటు ముందు రోజు రాత్రే ప్రీమియర్లు వేయడానికి సిద్ధపడి కంటెంట్ మీద నమ్మకాన్ని స్పష్టం చేస్తున్నారు. బిగ్ బాస్ ఫేమ్ సోహైల్ ‘బూట్ కట్ బాలరాజు’ కామెడీని నమ్ముకుని వస్తోంది. ప్రమోషన్లకు పైసల్ లేవని, మంచి సినిమాని ఆదరించమని హీరో పబ్లిక్ గా చెప్పడం గమనార్హం. హాస్యాన్నే నమ్ముకున్న మరో మూవీ ‘కిస్మత్’లో సపోర్టింగ్ ఆర్టిస్టులే హీరోగా నటించారు. తమను తక్కువంచనా వేయొద్దని ‘గేమ్ ఆన్’ టీమ్ చెబుతోంది. ఇవి కాకుండా హ్యాపీ ఎండింగ్, ధీర, మెకానిక్, ఉర్విలు అదృష్టాన్ని పరీక్షించుకునేందుకు బరిలో దిగుతున్నాయి.

కౌంట్ అయితే పెద్దగానే ఉంది కానీ ప్రేక్షకులను ఫైనల్ గా మెప్పించాల్సింది క్వాలిటీనే. కాకపోతే మరీ ఇంత తీవ్రమైన పోటీలో ఎంత చిన్న సినిమాలైనా సరే ఈ స్థాయిలో పోటీ పడటం వల్ల కలిగే ప్రయోజనం అంతు చిక్కడం లేదు. ఆపై వారం రవితేజ ఈగల్, యాత్ర 2, రజినీకాంత్ లాల్ సలామ్ లు వస్తాయి. హనుమాన్ ఎలాగూ కొనసాగుతోంది. సో పైన చెప్పిన ఎనిమిది సినిమాలకు టాక్ కీలక పాత్ర పోషించనుంది. వీటిలో జనాలకు నిజంగా ఏవి రీచ్ అవుతాయో, ఏవి మొక్కుబడి రిలీజ్ గా మిగిలిపోతాయో చూడాలి. థియేటర్ల సమస్య లేదు. డిమాండ్ కు తగ్గట్టు వాటికి సరిపడా దొరుకుతున్నాయి.