స్టార్ హీరోలూ.. హనుమాన్ ఘనత చూశారా?

అమెరికాలో తెలుగు సినిమాలకు ఉన్న డిమాండే వేరు. ఒకప్పుడు అక్కడ హిందీ సినిమాలు మాత్రమే రిలీజయ్యేవి. కానీ తర్వాతి కాలంలో తెలుగు సినిమాల హవా మొదలైంది. తెలుగు వాళ్లు ప్రపంచంలో ఎక్కడ ఉన్నా సినిమాల పట్ల చూపించే అభిమానమే వేరు. యుఎస్‌లో తెలుగు ఎన్నారైల సంఖ్య పెరిగిపోవడంతో అందుకు తగ్గట్లే మన సినిమాల హంగామా కూడా పెరిగింది. టికెట్ల ధరలు ఎంత పెట్టినా.. షోలు ఎంత దూరంలో ఉన్నా మన వాళ్లు రాజీ పడరు. ఈ డిమాండ్ చూసే ప్రిమియర్ షోలను భారీ స్థాయిలో ప్లాన్ చేయడం, భారీ రేట్లు పెట్టడం చేశారు అక్కడి డిస్ట్రిబ్యూటర్లు.

ప్రిమియర్స్ తర్వాత నార్మల్ షోలకు కూడా హిందీ చిత్రాలతో పోలిస్తే తెలుగు సినిమాల రేట్లే ఎక్కువ ఉంటాయి. మన సినిమాలు అక్కడ చాలా వేగంగా మిలియన్ల కొద్దీ వసూళ్లు రాబట్టడానికి ఇదే కారణం. ఐతే రేట్లు మరీ పెంచేయడం వల్ల ప్రతికూల ప్రభావం కూడా పడుతున్న మాట వాస్తవం. దాని వల్ల ఆక్యుపెన్సీలు, లాంగ్ రన్ తగ్గి వసూళ్లు అనుకున్నంత స్థాయిలో ఉండట్లేదు.

ఇలాంటి తరుణంలో హనుమాన్ సినిమా యుఎస్‌లో అద్భుతం చేసింది. రిలీజ్‌కు ముందు ఈ సినిమాకు మరీ డిమాండ్ ఏమీ లేకపోవడం, సంక్రాంతికి గుంటూరు కారం లాంటి భారీ చిత్రం ఉండడంతో ‘హనుమాన్’కు 12 డాలర్ల నార్మల్ రేటు పెట్టారు. కాగా హనుమాన్‌కు మంచి టాక్ రావడం, గుంటూరు కారం అంచనాలకు తగ్గట్లు లేకపోవడంతో యుఎస్ ఆడియన్స్ వెంటనే అటు మళ్లారు. దీంతో యుఎస్‌లో ఎవ్వరూ ఊహించని స్థాయిలో హనుమాన్ వసూళ్లు పెరిగిపోయాయి. మిలియన్, 2 మిలియన్, 3 మిలియన్.. ఇలా ఒక్కో మైలురాయిని దాటుకుంటూ ఆ చిత్రం ఇప్పుడు ఏకంగా 5 మిలియన్ డాలర్లు కొల్లగొట్టింది.

బాహుబలి-1, బాహుబలి-2, ఆర్ఆర్ఆర్, సలార్ లాంటి భారీ చిత్రాల తర్వాత ఈ ఘనత అందుకున్న చిత్రం ‘హనుమాన్’యే. మిగతా చిత్రాల్లో వేటికీ టికెట్ ధర 25 డాలర్లకు తక్కువ లేదు. కానీ హనుమాన్ 12 డాలర్ల నార్మల్ రేటుతో ఈ ఘనత అందుకుని సంచలనం సృష్టించింది. కంటెంట్ బలంగా ఉండి, రేట్లు తక్కువ ఉండడం హనుమాన్‌కు పెద్ద ప్లస్ అయింది. ఇది పెద్ద సినిమాలు తీసేవాళ్లందరూ చూసి నేర్చుకోవాల్సిన పాఠం.