20 ఏళ్ళ క్రితం కృష్ణవంశీ చేసిన పొరపాటు

క్రియేటివ్ డైరెక్టర్ గా పేరున్న కృష్ణవంశీకి హనుమాన్ కి ఒక మర్చిపోలేని కనెక్షన్ ఉంది. సరిగ్గా 20 ఏళ్ళ క్రితం 2004లో అయన శ్రీ ఆంజనేయం ఇచ్చారు. నితిన్ హీరోగా యాక్షన్ కింగ్ అర్జున్ సర్జని అంజనీ పుత్రుడి పాత్రలో భారీ బడ్జెట్ తో తీశారు. అంచనాలు మాములుగా ఏర్పడలేదు. ఓపెనింగ్స్ ఊహించిన దానికన్నా ఎక్కువ వచ్చాయి. పైగా మెలోడీ బ్రహ్మ మణిశర్మ సంగీతం. పబ్లిసిటీ ఘనంగా చేశారు. కాంబో క్రేజ్ రావడానికి ఇంతకన్నా ఏం చేయాలి. విజువల్ ఎఫెక్ట్స్ మీద ప్రత్యేక శ్రద్ధ తీసుకున్నారు. ఇంతా చేసి శ్రీ ఆంజనేయం అంచనాలు అందుకోలేక ఫెయిల్యూరయ్యింది.

ఈ సినిమా వరకు కృష్ణవంశీ చేసిన ప్రధాన పొరపాటు మాస్ ఆడియన్స్ కోసమని హీరోయిన్ ఛార్మీతో అవసరానికి మించి గ్లామర్ షో చేయించడం, అతిగా మాట్లాడేలా క్యారెక్టర్ ని డిజైన్ చేసి కొంచెం ఓవరాక్షన్ చేయించడం. ఇది ప్రధానంగా ఫ్యామిలీ జనాలకు నచ్చలేదు. పూల గుమగుమ చేరని అంటూ ఘాటు రొమాంటిక్ సాంగ్ కూడా పెట్టారు. కానీ ఇప్పుడొచ్చిన హనుమాన్ చూస్తే దర్శకుడు ప్రశాంత్ వర్మ అసలు అలాంటి అంశాల జోలికే వెళ్ళలేదు. అమృతా అయ్యర్ కు పాటలున్నాయి కానీ అవి హుందాగా, సందర్భానికి తగ్గట్టు ఉంటాయి. అందుకే క్లీన్ ఫాంటసీ ఎంటర్ టైనర్ గా నిలుస్తోంది.

ఇప్పుడిది గుర్తు చేయడానికి కారణం హనుమాన్ సాధించిన ఘన విజయమే. ఒకవేళ ఆ టైంలో కృష్ణవంశీ కనక కేవలం సబ్జెక్టుకే కట్టుబడి ఉంటే మంచి ఫలితం వచ్చేది. శ్రీ ఆంజనేయం ఎప్పుడు చూసినా అందులో గ్రాఫిక్స్ ఆశ్చర్యపరుస్తాయి. కొన్ని సీన్లు మంచి కిక్ ఇస్తాయి. అయినా సరే కష్టమంతా వృధా అయిపోయింది. ప్రస్తుతం రికార్డుల పని పట్టడమే టార్గెట్ గా పెట్టుకున్న హనుమాన్ ఇప్పట్లో నెమ్మదించే సూచనలు కనిపించడం లేదు. అనూహ్యంగా గుంటూరు కారం లాంటి గట్టి పోటీని తట్టుకుని మరీ విజేతగా నిలిచే దిశగా వెళ్లడం అనూహ్య పరిమాణం. చిన్న సినిమాగా వచ్చి పెద్ద విజయం జేబులో వేసుకుంది.