సల్మాన్ వల్ల కానిది హృతిక్ వల్ల అవుతుందా?

యశ్ రాజ్ ఫిలిమ్స్ స్పై యూనివర్స్ లో భాగంగా ఆరంభంలో వచ్చిన పఠాన్ సినిమా ఎంత పెద్ద బ్లాక్ బస్టర్ అయిందో తెలిసిందే. దీనికంటే ముందే వార్ మూవీతో బ్లాక్ బస్టర్ కొట్టిన సిద్ధార్థ్ ఆనంద్.. పఠాన్ ను దాన్ని మించి హిట్ చేశాడు. ఈ కోవలోనే సల్మాన్ ఖాన్ సినిమా టైగర్ 3 కూడా అవుతుందని యశ్ రాజ్ ఫిలిమ్స్ ఆశించింది. కానీ అది ఇంపాక్ట్ చూపించలేకపోయింది. అయితే ఇప్పుడు మరో భారీ బాలీవుడ్ స్పై మూవీ ప్రేక్షకుల ముందుకు రావడానికి సిద్ధమవుతోంది. అదే.. ఫైటర్. స్పై సినిమాలు తీయడంలో సిద్ధహస్తుడైన సిద్ధార్థ ఆనందే దీనికి కూడా దర్శకుడు. అతనితో వార్ మూవీ చేసిన హృతిక్ రోషన్ ఇందులో హీరో. ఈ కాంబినేషన్ కు ఉన్న క్రేజే వేరు. ఆ క్రేజ్ కు తగ్గట్టే తాజాగా రిలీజ్ అయిన ఫైటర్ ఫస్ట్ లుక్ బంపర్ రెస్పాన్స్ తెచ్చుకుంది.

హృతిక్ సిద్ధార్థ్ కాంబినేషన్లో వచ్చిన తొలి చిత్రం బ్యాంగ్ బ్యాంగ్ కూడా అప్పట్లో కమర్షియల్ గా పెద్ద సక్సెస్ సాధించింది. ఇక వార్, పఠాన్ చిత్రాల తర్వాత.. సిద్ధార్థ్ నుంచి వస్తున్న సినిమా కావడం, పైగా హృతిక్ రోషన్ హీరో కావడంతో ఈ సినిమాకు ఆకాశమే హద్దు అని భావిస్తున్నారు అభిమానులు. కానీ టైగర్ 3 కొంచెం కంగారు పెడుతుంది. స్పై థ్రిల్లర్స్ అంటే ఒక మూసలో సాగిపోతాయని ఫీలింగ్ కలిగించింది చిత్రం. వరుసుగా ఇలాంటి సినిమాలన్నీ ఒకేలా ఉంటుండటం ప్రేక్షకులకు మొనాటనస్ ఫీలింగ్ వస్తోంది. ఆ ఫీలింగ్ పోగొట్టి.. కొత్తగా ఏదైనా అందిస్తే మాత్రం పెద్ద బ్లాక్ బస్టర్ కావడం ఖాయం. ఈ ఏడాది పఠాన్ లాగే వచ్చే ఏడాది గణతంత్ర దినోత్సవ వీకెండ్లో ఈ చిత్రం విడుదల కానుంది.