నితిన్.. ఎప్పుడైనా అదే మాట

టాలీవుడ్ యువ కథానాయకుడు నితిన్.. పవర్ స్టార్ పవన్ కళ్యాణ్‌కు పెద్ద ఫ్యాన్ అని కొత్తగా చెప్పాల్సిన పని లేదు. తాను సినిమాల్లోకి రావడానికి కారణమే పవన్ అంటాడతను. ‘తొలి ప్రేమ’ చూసి పిచ్చెక్కిపోయి ఎలాగైనా సినిమాల్లోకి రావాలని పంతం పట్టి ఇటు వైపు అడుగులు వేసినట్లు పలు సందర్భాల్లో చెప్పాడు నితిన్. హీరోగా తనకంటూ ఒక ఇమేజ్ తెచ్చుకున్నాక కూడా నితిన్ ఒక సగటు ఫ్యాన్ బాయ్ లాగే వ్యవహరించాడు. తన సినిమాల్లో ఏమాత్రం ఛాన్స్ ఉన్నా పవన్ కళ్యాణ్ రెఫరెన్సులు పెడుతుంటాడు.

ఐతే దీన్ని కేవలం అభిమానం అని కాకుండా.. ‘వాడకం’ అనే వాళ్లు కూడా లేకపోలేదు. తన కొత్త చిత్రం ‘ఎక్స్‌ట్రా ఆర్డినరీ మ్యాన్’లోనూ నితిన్ పవన్ రెఫరెన్స్ పెట్టాడు. ‘బద్రి’ సినిమాలోని పవన్ గెటప్‌లో నితిన్ ఉన్న పోస్ట్ కూడా ఈ మధ్యే ఒకటి వదిలారు.

ఆల్రెడీ ‘లై’ సినిమాలో ఒకసారి ఇదే గెటప్ వేసిన నితిన్.. ఇంకోసారి ఆ గెటప్ రిపీట్ చేయడంతో ఇదేం వాడకం అంటూ సోషల్ మీడియాలో కామెంట్లు పడ్డాయి. దీని గురించి ఒక ఇంటర్వ్యూలో నితిన్‌కు ప్రశ్న ఎదురైంది. కెరీర్ ఆరంభంలో తమ అభిమాన కథానాయకుడి పేరు వాడుకున్నప్పటికీ.. ఒక స్థాయి వచ్చాక వదిలేస్తారని.. కానీ మీరు మాత్రం మారలేదేంటి.. పవన్ వాడకం శ్రుతి మించుతోందనే కామెంట్లకు ఏమంటారు అని నితిన్‌ను అడిగారు.

దీనికి నితిన్ బదులిస్తూ.. ‘‘నేను అప్పుడు, ఇప్పుడు, ఎప్పుడూ పవన్ కళ్యాణ్ గారికి వీరాభిమానిని. ఇది ఎప్పటికీ మారదు. నేను ఏ స్థాయికి వెళ్లినా కూడా సగటు అభిమాని లాగే ఉంటాను. ఆయన మీద ఉన్నఅభిమానాన్ని ఇలాగే చూపిస్తాను. ఎప్పుడైనా నాది ఒకటే మాట. కొందరు కెరీర్ ఆరంభంలో ఒక హీరోకు ఫ్యాన్స్ అంటారు. తర్వాత తమ రేంజ్ పెరిగిందని ఆ మాట చెప్పరు. కానీ నేను ఎప్పుడూ ఇలాగే ఉంటా. ‘ఎక్స్‌ట్రా’ సినిమాలో పవన్ కళ్యాణ్ గెటప్ ఊరికే వేయలేదు. అందులో ఒక సన్నివేశంలో అవసరం పడి ఆ గెటప్ వేశాను. ఎవరేమన్నా నేను కళ్యాణ్ గారికి ఒక ఫ్యాన్‌గా ఇలాగే ఉంటాను’’ అని నితిన్ తేల్చి చెప్పాడు.