వేరే దారి లేదు హనుమాన్

సంక్రాంతి రేసులోకి ఒకదాని తర్వాత ఒక సినిమా వస్తూనే ఉన్నాయి. ఈ వరద ఎంతకీ ఆగట్లేదు. ఇప్పటికే అరడజను సినిమాలు సంక్రాంతి డేట్ ఫిక్స్ చేసుకోవడం విశేషం. కానీ అక్కడ మూడు సినిమాలకు మించి స్కోప్ తక్కువే. ఈ ఏడాది సంక్రాంతికి రెండు తెలుగు చిత్రాలకు తోడుగా.. రెండు అనువాద చిత్రాలకు థియేటర్లు సర్దుబాటు చేయడమే కష్టమైంది. మామూలుగా అయితే రెండు పెద్ద సినిమాలను బాగా ఆడించుకోవడానికి సంక్రాంతికి స్కోప్ ఉంటుంది.

కష్టమ్మీద ఒకో సినిమాను ఇరికించవచ్చు. అంతకుమించి సినిమాలు వస్తే.. పరిస్థితి ఎలా ఉంటుందో 2016 సంక్రాంతి టైంలో చూశాం. బాలయ్య సినిమా ‘డిక్టేటర్’ ఆ పోటీలో దెబ్బ తింది. మంచి టాక్ తెచ్చుకున్న ‘నాన్నకు ప్రేమతో’కు కూడా ఆశించిన స్థాయిలో వసూళ్లు రాలేదు. ‘సోగ్గాడే చిన్నినాయనా’ పంట పండించుకుంటే.. ‘ఎక్స్‌ప్రెస్ రాజా’ కూడా మంచి ఫలితాన్నందుకుంది. అంత పోటీలో వచ్చినపుడు టాక్ బాలేని సినిమాకు గట్టి దెబ్బ తగులుతుంది.

ఈ విషయం తెలిసి కూడా ఆల్రెడీ ‘గుంటూరు కారం’తో పాటు ‘ఈగల్’, ‘సైంధవ్’, ‘నా సామిరంగా’; ‘హనుమాన్’ సినిమాలు సంక్రాంతి రిలీజ్ ఖాయం చేసుకున్నాయి. కొత్తగా ‘ఫ్యామిలీ స్టార్’ కూడా రేసులోకి వచ్చింది. వీటిలో ‘గుంటూరు కారం’ కచ్చితంగా సంక్రాంతికే వచ్చేలా ఉంది. దాని విషయంలో డౌట్ లేదు. ‘సైంధవ్’, ‘ఫ్యామిలీ స్టార్’ కూడా పక్కా అంటే పక్కా అన్నట్లున్నాయి. వాటికి సురేష్ బాబు, దిల్ రాజుల అండ ఉంది. థియేటర్ల సమస్య లేదు. పీపుల్స్ మీడియా వాళ్లు ‘ఈగల్’ విషయంలో పట్టుదలతో ఉన్నారు.

కానీ ఈ సినిమా గురించి ఈ మధ్య అప్‌డేట్ ఏమీ లేదు. ఈ సినిమా సంక్రాంతికి రావడం కొంచెం డౌట్‌గానే ఉంది. ఇది వచ్చేట్లయితే అక్కడితో సంక్రాంతి బెర్తులు క్లోజ్ అయినట్లే. నా సామిరంగా షూట్ పూర్తవడాన్ని బట్టి రేసులో ఉంటుంది. లేదా ఆ సినిమా కూడా అనుమానమే. ఇక ‘హనుమాన్’ విషయానికి వస్తే.. ఇంత పోటీ మధ్య ఆ చిన్న సినిమాకు థియేటర్లు దక్కడం సందేహంగానే ఉంది. సినిమా రెడీ అయినా సరే.. థియేటర్లు దక్కించుకోవడం దానికి సవాలే. పోటీ కూడా సమస్యగా మారుతుంది. కాబట్టి ‘హనుమాన్’కు డేట్ మార్చక తప్పేలా లేదు.