ప్రభాస్ పుట్టినరోజుకి నిర్మాతల టెన్షన్

అదేంటి ఏడాదికోసారి వచ్చే హీరో పుట్టినరోజుకి నిర్మాతలు టెన్షన్ దేనికి అనుకుంటున్నారా. వేరే స్టార్లకు ఏమో కానీ ప్రభాస్ లాంటి ప్యాన్ ఇండియా డైనోసర్ ది మాత్రం ఖచ్చితంగా స్పెషల్ గా ఉండాలని ఫ్యాన్స్ డిమాండ్ చేస్తారు. అక్టోబర్ 23 ఎంతో దూరంలో లేదు. పదకొండు రోజులు ఆగితే డార్లింగ్ బర్త్ డే రాబోతోంది. కొత్త సినిమాలు సెట్స్ మీద భారీగా ఉన్నాయి కాబట్టి చాలా ఎక్కువ అప్డేట్స్ ఉంటాయని అభిమానులు ఆశిస్తున్నారు. ముఖ్యంగా సలార్ ట్రైలర్ మీద గంపెడాశలు పెట్టుకున్నారు. కల్కి టీమ్ ఎలాగూ ఒక పోస్టరో చిన్న టీజరో వదులుతుంది. అందులో సందేహం లేదు.

ఎటొచ్చి సలార్ ట్రైలర్ రావడమే అనుమానమని బెంగళూరు టాక్. విపరీతమైన ఒత్తిడి మధ్య పోస్ట్ ప్రొడక్షన్ పనులు చూసుకుంటున్న దర్శకుడు ప్రశాంత్ నీల్ ప్రతి విషయంలో విపరీతమైన శ్రద్ధ తీసుకుంటున్నాడు. అందులో భాగంగా ట్రైలర్ కూడా ఆల్టిమేట్ ఇవ్వాలనే ఉద్దేశంతో రెండు మూడు వెర్షన్లు తయారు చేయిస్తున్నాడట. అయితే ఏదీ పూర్తి సంతృప్తినివ్వడం లేదని వినికిడి. తనకు పూర్తిగా బెస్ట్ అనిపించే వరకు వదిలే సమస్య లేదని చెప్పాడట. దీని స్థానంలో సినిమాలో ఏదైనా పాటకు సంబంధించిన లిరికల్ వీడియోని వదిలినా ఆ లోటుని కొంత వరకు భర్తీ చేయొచ్చు.

ఇక మారుతీ సినిమా గురించి ఎలాంటి న్యూస్ ఉండకపోవచ్చు. ప్రస్తుతం సలార్ హైప్ నుంచి డీవియేట్ అయ్యేలా ఏదీ చేయకూడదని ప్రభాస్ ఇతర నిర్మాతలకు ముందే చెప్పడంతో స్పిరిట్ ప్రొడ్యూసర్లు సైతం సైలెంట్ గానే ఉంటారు. సో ఫైనల్ ఆ రోజు ఏమివ్వాలనే ఆందోళన సలార్ ప్రొడ్యూసర్లను ఒత్తిడికి గురి చేస్తోంది. న్యాయంగా చెప్పాలంటే సలార్ నుంచే రావడం కరెక్ట్. డిసెంబర్ 22 విడుదలకు అప్పటికి కేవలం రెండు నెలలు మాత్రమే సమయం ఉంటుంది. ఏం చేస్తారో చూడాలి. ఇతర ప్రొడక్షన్ హౌసుల నుంచి గ్రీటింగ్స్ తప్ప అఫీషియల్ ప్రాజెక్ట్ ప్రకటనలు వచ్చే అవకాశాలు చాలా తక్కువ.