కుర్రకారు హుషారులో ‘మ్యాడ్’ కాలేజీ

ఈ శుక్రవారం మీడియం రేంజ్ సినిమాల మధ్య పెద్ద యుద్ధమే జరగబోతున్న నేపథ్యంలో ప్రత్యేకంగా యువతని టార్గెట్ చేసుకున్న చిత్రం మ్యాడ్. సితార బ్యానర్ నాగవంశీ సోదరి హారికతో పాటు సాయి సౌజన్య నిర్మాతలుగా పరిచయమవుతున్న ఈ యూత్ ఫుల్ డ్రామా ద్వారా జూనియర్ ఎన్టీఆర్ బావమరిది నవీన్ నార్నే హీరోగా పరిచయమవుతున్నాడు. మొదలుపెట్టిన డెబ్యూ ఇది కాకపోయినా రిలీజ్ అవుతున్న క్రమంలో ఫస్ట్ మ్యాడే కాబట్టి ఇదే లాంచింగ్ కిందకు వస్తుంది. ఇవాళ తారక్ ట్విట్టర్ హ్యాండిల్ ద్వారా థియేట్రికల్ ట్రైలర్ ని విడుదల చేశారు. కంటెంట్ దేని గురించో స్పష్టంగా చెప్పేశారు.

అదో పెద్ద ఇంజనీరింగ్ కాలేజీ. అల్లరి తప్ప చదువనే ప్రపంచమే తెలియని ముగ్గురు కుర్రాళ్ళు(నార్నె నితిన్ – సంగీత్ శోభన్- రామ్ నితిన్) అక్కడ చేరతారు. ఏసికి కూలర్ కి తేడా తెలియని అమాయకత్వంతో పాటు ప్రిన్సిపల్(రఘుబాబు)ఫోటోని గోడ మీద అతికించి కామెడీ చేసే చిలిపితనం కూడా ఉంటుంది. ఇలా సరదాగా సాగిపోతున్న వీళ్ళ లైఫ్ లో క్యాంటీన్ కు సంబంధించిన సమస్య ఒకటి అడుగు పెడుతుంది. అసలు ఏ లక్ష్యం లేకుండా సాగిపోతున్న ఈ కుర్ర బ్యాచ్ చివరికి సాధించింది ఏమిటి, ఎంజాయ్ మెంట్ కి కేరాఫ్ అడ్రెస్ గా నిలిచిన లైఫ్ లో ఇంకేమున్నాయో మ్యాడ్ లో చూడాలి.

మొత్తం యూత్ ఫుల్ జోకులుతో ట్రైలర్ నింపేశారు. దర్శకుడు కళ్యాణ్ శంకర్ చాలా క్లియర్ గా కుర్రకారుని నవ్వించడమే ధ్యేయంగా పెట్టుకుని దానికి అనుగుణంగానే సక్సెస్ అయినట్టు కనిపిస్తోంది. టీజర్ లో జోకులు కొన్ని కామెంట్స్ కి దారివ్వడంతో ఈసారి అవి లేకుండా జాగ్రత్త పడ్డారు. క్యాస్టింగ్ పర్ఫెక్ట్ గా కుదిరింది. జాతిరత్నాలు టైపులో సింపుల్ జోకులతోనే పెద్దగా నవ్వించే ప్రయత్నం జరిగింది. భీమ్స్ సంగీతం సమకూర్చిన మ్యాడ్ రెండు రోజుల ముందే ప్రీమియర్లకు రెడీ అవుతోంది. వినోదానికి లోటు లేకుండా ఉన్న ఈ సినిమా ట్రైలర్ కు తగ్గట్టే ఉంటే హిట్టు పడ్డట్టే.