జైలర్ మెడకు టైటిల్ వివాదం

వచ్చే నెల 10న విడుదల కాబోతున్న కోలీవుడ్ సూపర్ స్టార్ రజినీకాంత్ జైలర్ సినిమాకు టైటిల్ వివాదం చుట్టుముట్టింది. కేరళకు చెందిన దర్శక నిర్మాత సక్కిర్ మదత్తిల్ 2021లోనే ఈ పేరుని ఫిలిం ఛాంబర్ లో రిజిస్టర్ చేయించుకున్నారు. గడువు ముగిశాక రెన్యూవల్ కూడా అయ్యిందట. కానీ షూటింగ్ పూర్తయినప్పటికీ పలు కారణాల వల్ల విడుదల సాధ్యం కాలేదు. గతంలో దీని టైటిల్ లాంచ్ ని దుబాయ్ లో నిర్వహించినప్పుడు కమల్ హాసన్ అతిథిగా హాజరయ్యారు. ధ్యాన్ శ్రీనివాసన్ హీరోగా నటించిన జైలర్ కు మల్టీ లాంగ్వేజ్ లోనే ప్లాన్ చేసుకున్నారట.

ఇప్పుడీ వ్యవహారం మద్రాస్ హైకోర్టుకి చేరింది. ఆగస్ట్ 2న దీనికి సంబంధించిన తీర్పు వెలువడే అవకాశాలున్నాయి. ఒకవేళ రజని ప్రొడ్యూసర్లకు వ్యతిరేకంగా జడ్జ్ మెంట్ వస్తే ఇబ్బందే. ఎందుకంటే కేరళలో మలయాళంతో సమానంగా తమిళ వెర్షన్ కూడా ఆడుతుంది. అలాంటప్పుడు రెండు భాషలకు వేర్వేరు పేర్లు పెడితే ఆడియన్స్ అయోమయం చెందుతారు. అందుకే మధ్యవర్తిత్వం ద్వారా దీన్ని పరిష్కరించుకునే విధంగా తెరవెనుక చర్చలు జరుగుతున్నాయని తెలిసింది. అయినా షూటింగ్ మొదలైనప్పుడే జైలర్ అని పెడితే ఇప్పుడు కేసు పెట్టడం ఏమిటో.

రిలీజ్ కు ఇంకో ఇరవై నాలుగు రోజులు మాత్రమే ఉండటంతో టీమ్ పబ్లిసిటీ మీద దృష్టి పెడుతోంది. తెలుగులో చిరంజీవి భోళా శంకర్, హిందీలో గదర్ 2, ఓ మై గాడ్ 2 గట్టి పోటీ ఇవ్వబోతున్నాయి. తమన్నాతో చేయించిన కావాలయ్యా పాట మెల్లగా మాస్ కి ఎక్కేస్తోంది. ముందు నెగటివ్ ఫీడ్ బ్యాక్ వచ్చినప్పటికీ అనిరుద్ రవిచందర్ సంగీతం క్రమంగా రీచ్ అవుతోంది. మోహన్ లాల్, శివ రాజ్ కుమార్ లు జైలర్ లో ప్రత్యేక క్యామియోలు చేయడం అంచనాలు పెంచుతోంది. సునీల్ కూడా స్పెషల్ రోల్ చేశాడు. తెలుగు మార్కెట్ బాగా తగ్గిపోయిన రజని ఆశలన్నీ జైలర్ మీదే ఉన్నాయి