నాయకుడు మన ప్రేక్షకులకు నచ్చుతాడా

రెండు వారాల క్రితం కోలీవుడ్ లో విడుదలై మంచి విజయం అందుకున్న మామన్నన్  తెలుగులో నాయకుడుగా తీసుకురాబోతున్నారు. హీరో ఉదయనిధి స్టాలిన్ కి ఇప్పటిదాకా మన దగ్గర మార్కెట్ లేదు. అప్పుడెప్పుడో ఓకే ఓకే  అనే డబ్బింగ్ మూవీ ఓ మోస్తరుగా ఆడటం తప్పించి ఏపీ తెలంగాణ జనాలకు తన గురించి తెలిసింది తక్కువే. నెట్ ఫ్లిక్స్ ని రెగ్యులర్ గా ఫాలో అయ్యేవాళ్ళకు ఈ మధ్య ఎక్కువగా కనిపిస్తున్నాడు. అరవంలో హీరోగా, నిర్మాతగా, డిస్ట్రిబ్యూటర్ గా, ప్రజా ప్రతినిధిగా, సిఎం స్టాలిన్ కొడుకుగా ఇతని నెట్ వర్క్ చిన్నది కాదు. మామన్నన్ తో నటనకు స్వస్తి చెబుతానని ఇంతకు ముందే ప్రకటించాడు.

అక్కడ ఎంత బాగా ఆడినా మామన్నన్ ని మనవాళ్ళు ఎలా రిసీవ్ చేసుకుంటారో చూడాలి. ఎందుకంటే ఇది చాలా సీరియస్ సబ్జెక్టుతో రూపొందింది. అగ్ర వర్ణాలు, వెనుకబడిన కులాల మధ్య ఆధిపత్య పోరాటాన్ని రాజకీయాలకు ముడిపెట్టి తీశాడు దర్శకుడు మారి సెల్వరాజ్. సూపర్ స్టార్ రజనీకాంత్ ఇంటికి పిలిచి మరీ మెచ్చుకున్నారంటే ఏ రేంజ్ లో ఎక్కిందో అర్థం చేసుకోవచ్చు. ముఖ్యంగా కేవలం కమెడియన్ గానే మనకు పరిచయమున్న వడివేలులోని సీరియస్ యాంగిల్ ఈ నాయకుడులో అద్భుతంగా ఆవిష్కరించారు. అది మనకు సర్ప్రైజ్ గానే ఉండబోతోంది.

ఇవి కాకుండా పుష్ప విలన్ ఫహద్ ఫాసిల్, హీరోయిన్ కీర్తి సురేష్ క్యాస్టింగ్ లో ఆకర్షణగా నిలుస్తున్నారు. వీటికి తోడు ఏఆర్ రెహమాన్ సంగీతం మరో అట్రాక్షన్. అన్నీ పుష్కలంగా ఉన్న నాయకుడు మరీ ఎక్స్ ట్రాడినరని చెప్పలేం కానీ కాంతార టైపులో ఏదైనా మేజిక్ జరగకపోదాని నిర్మాతలు ఆశిస్తున్నారు. ఒరిజినల్ నిర్మించిన రెడ్ జాయింట్ ఫిలిమ్స్ తో పాటు సురేష్ ప్రొడక్షన్స్, ఏషియన్ సినిమా కలిసి సంయుక్తంగా నాయకుడిని పంపిణి చేయబోతున్నారు. జూలై 14న బేబీ, శివకార్తికేయన్ మహావీరుడుతో పోటీ పడబోతున్న నాయకుడు ఏ మేరకు మెప్పిస్తుందో చూడాలి