యూనివర్శ్‌ను వదలని లోకేష్ కనకరాజ్

ఇండియన్ సినిమాలో మల్టీవర్స్ అనే మాటను బాగా పాపులర్ చేసింది లోకేష్ కనకరాజే. మానగరం, ఖైదీ, మాస్టర్, విక్రమ్.. ఇప్పటిదాకా ఈ తమిళ దర్శకుడు తీసిన సినిమాల్లో ప్రతిదానికీ ఇంకో సినిమాతో లింక్ కనిపిస్తుంది. ఈ సినిమాలన్నింట్లోనూ డ్రగ్ మాఫియా చుట్టూనే కథలు తిరుగుతాయి. ఒక సినిమాలోని పాత్రలు ఇంకో సినిమాలో పరోక్షంగా తమ ప్రాధాన్యాన్ని చాటుకుంటూ ఉంటాయి.

ముఖ్యంగా ‘విక్రమ్’ సినిమాతో ‘లోకేష్ సినిమాటిక్ యూనివర్శ్’ (ఎల్‌సీయూ) అనే మాట బాగా పాపులర్ అయింది. ఈ మల్టీవర్స్ ట్రెండ్‌ను వేరే దర్శకులు కూడా అందిపుచ్చుకునే ప్రయత్నంలో ఉన్నారు. బాలీవుడ్ మూవీ ‘పఠాన్’లో సైతం ఈ మల్టీవర్స్ కాన్సెప్ట్ చూడొచ్చు. యశ్ రాజ్ ఫిలిమ్స్ వాళ్లు కూడా ఇలాగే స్పై యూనివర్శ్ అని పెట్టి పాత్రలు.. కథలను మిక్స్ చేస్తున్నారు. లోకేష్ విషయానికి వస్తే ‘లియో’లో సైతం తన ఎల్సీయూను అతను కంటిన్యూ చేస్తున్నట్లే కనిపిస్తోంది.

ఈ సినిమా సైతం డ్రగ్ మాఫియా చుట్టూనే తిరగబోతోందని ‘నా రెడీ’ పేరుతో రిలీజ్ చేసిన పాట చూస్తే అర్థమవుతుంది. ఒక పెద్ద డ్రగ్ మాఫియాకు చెందిన డెన్‌లో ఈ పాట సాగేట్లు చూపించారు. ‘విక్రమ్’ సినిమాలో ఒక సీన్లో కనిపించే ‘దాస్ అండ్ కో’ లోగోను ఈ పాటలో ఒక చోట చూపించారు. అంతే కాక లోకేష్ ప్రతి సినిమాలోనూ చూపించే బిరియాని సీన్ ఈ పాటలోనూ కనిపించింది.

లోకేష్ మార్కు రౌడీలు.. వాళ్ల గెటప్‌లు.. అతడి సినిమాల్లో ఎప్పుడూ కనిపించే కలర్ ఫ్రేమ్స్.. ఇవన్నీ ఈ పాటలో ఉన్నాయి. ఈ పాట చూసి లోకేష్ సినిమాటిక్ యూనివర్శ్ పట్ల అమితాసక్తితో ఉన్న ఆడియన్స్ ఎగ్జైట్ అవుతున్నారు. ఈ సినిమాతో ఎల్‌సీయూను ఇంకో స్థాయికి తీసుకెళ్తాడని.. ఇండియన్ సినిమాల్లో దీన్నొక బ్రాండుగా మారుస్తాడని అంచనా వేస్తున్నారు. లియో దసరా కానుకగా అక్టోబర్లో రిలీజ్ కానున్న సంగతి తెలిసిందే.