ఫ్యాన్ వీడియోతో మతులు పోగొట్టేశాడు

క్రియేటివిటీకి హద్దులు ఉండవు నిజమే. కాకపోతే సరైన వేదిక సందర్భం రావాలి అంతే. హీరో విజయ్ పుట్టినరోజు సందర్భంగా మ్యాడీ మాధవ్ అనే యువకుడు ఒక వీడియో తయారు చేశాడు. తనకు వచ్చిన యానిమేషన్ టెక్నాలజీని వాడి త్రీడి సాంకేతికత జోడించి ఫ్యాన్స్ కి గిఫ్ట్ గా ఇచ్చాడు. మొత్తం 3 నిమిషాల 30 సెకండ్లున్న వీడియో ట్విట్టర్ ని ఒక్కసారిగా ఊపేసింది. ఇరవై నాలుగు గంటలు గడవకుండానే ఏకంగా 8 మిలియన్ల వ్యూస్ కి దగ్గరగా వెళ్ళిపోయి లక్షా ఇరవై వేల లైకులు, 40 వేలకు దగ్గరలో రీ ట్వీట్లు తెచ్చేసుకుంది. అయిదు వేల కొటేషన్లు పడటం మరో షాక్.

అంతగా ఇందులో ఏముందంటే తన శత్రువును లక్ష్యంగా పెట్టుకుని కారులో నిర్మానుష్యంగా ఏడాది లాంటి ప్రాంతం మధ్యలో ఉన్న రోడ్ల మీద వెళ్తున్న విజయ్ ప్రయాణంలో ఉండగానే టార్గెట్ ని షూట్ చేస్తాడు. బండి దిగేసి తన కోసం వెనకే వస్తున్న పదుల సంఖ్యలో వాహనాల్లో దిగుతున్న వాళ్లకు కత్తి తీసి స్వాగతం చెబుతాడు. నిజంగానే నటించాడేమో అన్నంత లైవ్లీగా మాధవ్ దీన్ని రూపొందించాడు. రెస్పాన్స్ ఏ స్థాయిలో ఉందంటే వెంకట్ ప్రభు, మనోజ్ పరమహంస, అశ్విన్ రామ్, మణికందన్ లాంటి ప్రముఖులు ప్రత్యేకంగా అభినందనలు తెలుపుతూ మెసేజ్ చేశారు.

ఇది చాలా వైరల్ అయిపోయింది. నిజంగానే ఫ్యాన్స్ కి కథలు రాసే తీసే ఛాన్స్ ఇస్తే అరాచకం ఏ స్థాయిలో ఉంటుందో చెప్పడానికి మాధవ్ ఒక ఉదాహరణగా నిలుస్తున్నాడు. ఇతగాడి టాలెంట్ ఎంతగా రీచ్ అయ్యిందంటే పవన్ మహేష్ తారక్ అభిమానులు తమకూ అలాంటి వీడియో ఒకటి చేసి పెట్టమని, కావాలంటే దానికి అయ్యే ఖర్చు మొత్తం పెట్టుకుంటామని ఆఫర్లు ఇస్తున్నారు. స్వయానా హీరో విజయ్ ఇది చూసి ఒకసారి రమ్మని కబురు పెట్టాడని చెన్నై టాక్. మొత్తానికి ప్రతిభతో కూడా సోషల్ మీడియా ఏ స్థాయి గుర్తింపు తెస్తుందో ఇంతకన్నా ఉదాహరణ కావాలా.