మహేష్ మీద చిరుకు ఎంత ప్రేమో..

ఈ రోజు సూపర్ స్టార్ మహేష్ బాబు పుట్టిన రోజు. ఈ సందర్భంగా సోషల్ మీడియా అంతటా మహేష్ పేరు మార్మోగిపోతోంది. తండ్రి వారసత్వాన్నందుకుని నటనలోకి వచ్చిన మహేష్.. తండ్రిలాగే సూపర్ స్టార్ అనిపించుకోవడానికి ఎంతో సమయం పట్టలేదు. పెద్ద మాస్ హీరోగా ఎదగడమే కాదు.. నటుడిగానూ చాలా తక్కువ సమయంలోనే మంచి పేరు సంపాదించాడు. అవార్డులు కొల్లగొట్టాడు.

‘ఒక్కడు’తో మొదలుపెట్టి తరచుగా రికార్డుల మోత మోగిస్తూ సాగిసోతున్నాడు మన సూపర్ స్టార్. చివరగా సంక్రాంతికి విడుదలైన మహేష్ మూవీ ‘సరిలేరు నీకెవ్వరు’ యావరేజ్ కంటెంట్‌తోనే కలెక్షన్ల మోత మోగించింది. ఇప్పుడిక ‘సర్కారు వారి పాట’తో సందడికి సిద్ధమవుతున్నాడు మహేష్. పుట్టిన రోజు సందర్భంగా రిలీజైన దీని మోషన్ పోస్టర్ అందరినీ ఆకట్టుకుంటోంది.

ఇదిలా ఉంటే.. సోషల్ మీడియాలో టాలీవుడ్ టాప్ సెలబ్రెటీలందరూ మహేష్‌ మీద తమ అభిమానాన్ని చూపిస్తూ శుభాకాంక్షలు చెబుతున్నారు. అందరిలోకి మెగాస్టార్ చిరంజీవి విష్ ప్రత్యేకం. మహేష్‌ను తన బిడ్డలా భావిస్తానంటూ ‘సరిలేరు..’ ఆడియో వేడుకలో ఎంత ప్రేమగా మాట్లాడాడో తెలిసిందే. తన ట్వీట్లో కూడా మహేష్ మీద ప్రేమను దాచుకోలేదాయన. ‘‘అందం, అభినయం భగవంతుడు మీకిచ్చిన వరం. మరెన్నో మరిచిపోలేని పాత్రలు చేయాలనీ, మీ కలలన్నీ నెరవేరాలని కోరుకుంటూ, హ్యాపీ బర్త్ డే మహేష్. ఈ ఏడాదంతా నీకు గొప్పగా సాగాలి’’ అని చిరు ట్వీట్ వేశాడు.

మహేష్‌ను మీరు అని గౌరవిస్తూ చిరు ఇలా ట్వీట్ చేయడం అందరినీ ఆశ్చర్యపరిచింది. మరోవైపు జూనియర్ ఎన్టీఆర్.. మహేష్‌ను అన్నా అని సంబోధిస్తూ పుట్టిన రోజు శుభాకాంక్షలు చెప్పాడు. ఇక మహేష్ ఫ్యాన్స్ అయితే.. ట్విట్టర్ రికార్డుల అంతు చూడటమే లక్ష్యంగా ‘హ్యాపీ బర్త్ డే మహేష్ బాబు’ హ్యాష్ ట్యాగ్‌తో ట్వీట్ల మోత మోగిస్తున్నారు.