సోగ్గాడే దర్శకుడికి మెగా ఛాన్స్

సోగ్గాడే చిన్ని నాయనతో నాగార్జునకి కెరీర్ హయ్యెస్ట్ ఇచ్చి తిరిగి దాని సీక్వెల్ బంగార్రాజు రూపంలో తండ్రితో కలిపి చైతుకి ఓ మంచి హిట్ ఇచ్చిన దర్శకుడు కళ్యాణ్ కృష్ణ ఈ మధ్య బయట కనిపించడం తగ్గించేశాడు. ఎవరితో కాంబినేషన్ సెట్ కాక చాలా రోజులుగా వెయిటింగ్ లో ఉన్నాడు. అంత సుదీర్ఘ నిరీక్షణకు తగ్గ ఫలితం దొరికిందని లేటెస్ట్ అప్డేట్. ఈసారి ఏకంగా మెగాస్టార్ చిరంజీవినే ఒప్పించారని తెలిసింది. నేను లోకల్, ధమాకా లాంటి బ్లాక్ బస్టర్స్ తో స్టార్ రైటర్ గా ఎదిగిన ప్రసన్న కుమార్ బెజవాడ ఇచ్చిన కథ మెగాస్టార్ దగ్గర గ్రీన్ సిగ్నల్ తెచ్చుకున్నట్టు వినికిడి.

ప్రస్తుతం భోళా శంకర్ ని పూర్తి చేయడం మీద సీరియస్ గా దృష్టి పెట్టిన చిరంజీవి దాని తర్వాత ఎవరితో చేస్తారనే కన్ఫ్యూజన్ మెగా ఫాన్స్ లో విపరీతంగా ఉంది. వెంకీ కుడుములుతో నిర్మాత డివివి దానయ్య చేయాల్సిన ప్రాజెక్టు క్యాన్సిల్ కావడంతో అదింకా ఎక్కువయ్యింది. ఈలోగా కళ్యాణ్ కృష్ణ నెరేషన్ తో చిరుని మెప్పించడం, ప్రొసీడ్ అవ్వమని చెప్పడం లోలోపల జరిగిపోయాయట. ఎంటర్ టైన్మెంట్, మాస్ ఎలిమెంట్స్ బాగా డీల్ చేస్తాడని పేరున్న కళ్యాణ్ కృష్ణకు రవితేజతో చేసిన నేల టికెట్టు ఒక్కటే చేదు అనుభవాన్ని మిగిల్చింది. మిగిలినవన్నీ హిట్లే

వాల్తేరు వీరయ్య తర్వాత తన నుంచి ప్రేక్షకులు ఏం కోరుకుంటున్నారో గుర్తించిన చిరంజీవి దర్శకుల ఇమేజ్ మార్కెట్ కంటే ఎక్కువగా కథకు ప్రాధాన్యం ఇస్తున్నారు. కమర్షియల్ అంశాలతో కాస్త కామెడీ యాక్షన్ ని జోడిస్తే చాలు వంద కోట్లు కొట్టేయొచ్చని ఋజువు కావడంతో గాడ్ ఫాదర్ లాంటి ప్రయోగాలకు దూరంగా ఉండాలని నిర్ణయించుకున్నారు. బింబిసార దర్శకుడు వశిష్ట కూడా చిరు దగ్గర ఓకే చేయించుకున్నాడు. ఇది కూడా ఒకేసారి సెట్స్ పైకి వెళ్లొచ్చు. దీని నిర్మాత యువి బ్యానర్ కాగా కళ్యాణ్ కృష్ణది మెగా తనయ సుస్మిత కొణిదెల ప్రొడక్షన్ లో ఉంటుంది