మహేష్ కామెంట్: నిన్నెంత ప్రేమిస్తున్నానో నీకెప్పటికీ తెలియదు

టాలీవుడ్లో కుటుంబానికి అమితమైన ప్రాధాన్యం ఇచ్చే హీరోల్లో మహేష్ బాబు ఒకరు. అతడి తీరు చూస్తే పక్కా ఫ్యామిలీ మ్యాన్ అనే ఫీలింగ్ కలుగుతుంది. ఏమాత్రం ఖాళీ దొరికినా ఆ సమయాన్ని కుటుంబానికే కేటాయిస్తాడు. తన పిల్లలంటే.. ముఖ్యంగా కూతురు సితార అంటే మహేష్‌కు ఎంతిష్టమో పలు సందర్భాల్లో చూశాం. సోమవారం సితార 8వ పుట్టిన రోజు జరుపుకుంటున్న నేపథ్యంలో కూతురిపై తన ప్రేమను మరోసారి చాటుకున్నాడు మహేష్.

తన పాప పుట్టినప్పటి నుంచి ఇప్పటిదాకా ఎదిగిన తీరు.. తనతో గడిపిన అనుభవాలతో ఒక స్వీట్ వీడియోను షేర్ చేసిన మహేష్.. ‘‘చాలా వేగంగా 8వ ఏడుకు వచ్చేశావ్. నిన్ను నేనెంతగా ప్రేమిస్తానంటే.. అది నీకెప్పటికీ తెలియనంత. నీకు జన్మదిన శుభాకాంక్షలు’’ అని కామెంట్ పెట్టాడు. దీంతో పాటుగా #situpapaturns8 అనే హ్యాష్ ట్యాగ్‌ను కూడా మహేష్ జోడించాడు. మరోవైపు నమ్రత శిరోద్కర్, గౌతమ్ సైతం వేర్వేరుగా సోషల్ మీడియాలో సితారకు విషెస్ చెప్పారు.

తమ జీవితాల్లోకి సితార అంతులోని సంతోషాన్ని తీసుకొచ్చిందని.. తను పుట్టడమే తన జీవితంలో అత్యంత ఆనందకరమైన విషయమని అన్న నమ్రత.. ప్రేమ, జాలి, ఆపేక్ష ఉన్న అమ్మాయిగా సితార ఎదుగుతుండటం తమకెంతో సంతోషంగా ఉందని పేర్కొంది. ఇక సితార తన వీపుమీదున్న ఫొటోను షేర్ చేసిన గౌతమ్.. తన పిగ్గీ బ్యాక్ పార్ట్‌నర్‌కు హ్యాపీ బర్త్ డే అని విష్ చేశాడు. మహేష్ అభిమానులు లక్షల మంది సితారకు శుభాకాంక్షలు చెబుతూ ట్వీట్లు వేస్తుండటం విశేషం.