క్రిస్మస్ కింగ్ ఎవరో?

ఈ నెల ఆరంభంలో ‘హిట్-2’ సినిమాతో టాలీవుడ్ బాక్సాఫీస్ కాస్త ఊపందుకున్నట్లే కనిపించింది. కానీ ఆ సినిమా తర్వాత థియేటర్లలో కళ తెచ్చే తెలుగు సినిమాలేవీ కనిపించలేదు. రెండో వారంలో వచ్చిన సినిమాలన్నీ దారుణంగా బోల్తా కొట్టాయి. గత వారం వచ్చిన హాలీవుడ్ మూవీ ‘అవతార్-2’ బాక్సాఫీస్ దగ్గర మంచి వసూళ్లే రాబడుతూ సాగుతోంది. కాగా క్రిస్మస్ వీకెండ్‌ను ఉపయోగించుకోవడానికి రెండు పేరున్న తెలుగు చిత్రాలతో పాటు రెండు అనువాదాలు కూడా బరిలోకి దిగుతున్నాయి.

ఇందులో ఎక్కువ అంచనాలున్నది రవితేజ సినిమా ‘ధమాకా’ మీదే. మాస్ రాజా ఈ ఏడాది ఇప్పటికే రెండు డిజాస్టర్లు ఎదుర్కొన్నప్పటికీ.. ‘సినిమా చూపిస్త మావ’, ‘నేను లోకల్’, ‘హలో గురూ ప్రేమ కోసమే’ లాంటి హిట్లు కొట్టిన డైరెక్టర్-రైటర్ ద్వయం త్రినాథరావు-ప్రసన్నకుమార్ చేసిన సినిమా కావడం.. ట్రైలర్ కూడా ఎంటర్టైనింగ్‌గా అనిపించడంతో సినిమా మీద మంచి అంచనాలే నెలకొన్నాయి. ‘పెళ్ళి సంద-డి’తో ఆకట్టుకున్న శ్రీలీల నటించిన రెండో చిత్రం ఇదే. శుక్రవారం రిలీజవుతున్న ఈ చిత్రానికి పోటీగా నిఖిల్ మూవీ ‘18 పేజెస్’ కూడా దిగుతోంది.

‘కార్తికేయ-2’ లాంటి బ్లాక్ బస్టర్ తర్వాత దానికి పూర్తి భిన్నంగా లవ్ స్టోరీతో ప్రేక్షకుల ముందుకు వస్తున్నాడు నిఖిల్. ‘కార్తికేయ-2’ హీరోయిన్ అనుపమ పరమేశ్వరనే ఇందులోనూ కథానాయిక. సుకుమార్ స్క్రిప్టునందించడం ఈ సినిమాకు అదనపు ఆకర్షణ. దీని ట్రైలర్ కూడా ఆకట్టుకుంది.
ఈ రెండు చిత్రాల కంటే ముందు గురువారం థియేటర్లలోకి దిగుతున్నాయి తమిళ అనువాదాలైన లాఠి, కనెక్ట్. ఇందులో విశాల్ నటించిన ‘లాఠి’ రొటీన్ మాస్ మూవీలాగే కనిపిస్తోంది. దానికి పెద్దగా బజ్ లేదు. నయనతార హార్రర్ థ్రిల్లర్ ‘కనెక్ట్’ మాత్రం ఆ జానర్ ప్రియుల్లో ఆసక్తి రేకెత్తిస్తోంది. మరి ఈ నాలుగు చిత్రాల్లో దేనికి మంచి టాక్ వస్తుంది..ఏది క్రిస్మస్ విజేతగా నిలుస్తుంది అన్నది చూడాలి.