రాత్రయితే కళ్లు కనిపించని హీరో

బ్యాగ్రౌండ్ లేకుండా సినీ రంగంలోకి అడుగు పెట్టి హీరోగా అవకాశం దక్కించుకోవడం అంటే చిన్న విషయం. అందులోనూ ఇలాంటి నేపథ్యం నుంచి వచ్చి ఓ మంచి సినిమాతో హీరోగా పరిచయం కావడం అంటే ఇంకా అరుదైన విషయం. కిరణ్ అబ్బవరం అనే కొత్త కుర్రాడికి ఇలాంటి అవకాశమే దక్కింది.

షార్ట్ ఫిలింల ద్వారా సత్తా చాటుకుని.. ‘రాజావారు రాణి వారు’ అనే చిన్న సినిమాతో హీరోగా పరిచయం అయ్యాడీ కుర్రాడు. ఆ సినిమా ప్రశంసలందుకుంది. కిరణ్‌కు కూడా మంచి పేరే వచ్చింది. ఈ సినిమా తర్వాత అతడికి మూడు చిత్రాల్లో కథానాయకుడిగా నటించే అవకాశం దక్కడం విశేషం. అందులో ఒకటి ‘ఎస్ఆర్ కళ్యాణ మండపం’. ‘ట్యాక్సీవాలా’ హీరోయిన్ ప్రియాంక జవాల్కర్ ఇందులో కథానాయికగా నటించడం విశేషం. ఇటీవలే దీని ఫస్ట్ లుక్ రిలీజైంది.

దీంతో పాటుగా కిరణ్ నటించిన మరో కొత్త సినిమా ఫస్ట్ లుక్‌ను కూడా లాంచ్ చేశారు. అదే.. సెబాస్టియన్. ఇందులో కిరణ్ పోలీస్ కానిస్టేబుల్ పాత్రలో నటిస్తున్నాడు. ఆ పాత్రకు సంబంధించి ఓ విశేషం ఉంది. అతడికి రేచీకటి ఉంటుంది. రాత్రి అయితే కళ్లు కనిపించవు. పోలీస్ డ్యూటీలంటే ఉదయం వెళ్లి సాయంత్రానికి ఇంటికి వచ్చేసేలా ఉండవు. ప్రతి రోజూ పొద్దు పొయ్యేదాకా పని చేయాలి. నైట్ డ్యూటీలు కూడా ఉంటాయి. మరి అలాంటి ఉద్యోగంలో పని చేస్తూ హీరోకు రేచీకటి ఉంటే అతడి పాట్లు మామూలుగా ఉండవు.

చిత్తూరు జిల్లాలోని మదనపల్లె నేపథ్యంలో ఈ సినిమా సాగుతుందట. కొత్త దర్శకుడు బాబు తత్వమసి ఈ చిత్రాన్ని రూపొందిస్తున్నాడు. ఎలైట్ ఎంటర్టైన్మెంట్ బేనర్ మీద ఈ చిత్రాన్ని నిర్మిస్తున్నారు. దీంతో పాటు కిరణ్ మరో కొత్త సినిమాలోనూ నటించబోతున్నాడు. దాని వివరాలు ఇంకా వెల్లడి కాలేదు.