హిట్-3.. అప్పుడే ఇంత హైపా?

శైలేష్ కొలను.. ఇప్పుడు టాలీవుడ్ హాట్ షాట్ డైరెక్టర్లలో ఒకడు. సీక్వెల్స్, ఫ్రాంచైజీ సినిమాలు అంతగా అచ్చిరాని టాలీవుడ్లో ‘హిట్’ ఫ్రాంచైజీని సూపర్ సక్సెస్ చేసి అందరూ తన గురించి చర్చించుకునేలా చేశాడీ డైరెక్టర్. క్రైమ్, ఇన్వెస్టిగేటివ్ థ్రిల్లర్ల విషయంలో తనకున్న పట్టును అతను ‘హిట్: ది ఫస్ట్ కేస్’లోనే చూపించాడు. హాలీవుడ్ ప్రమాణాలకు దగ్గరగా తీర్చిదిద్దిన ఈ థ్రిల్లర్ ఆ జానర్ ప్రియులను బాగానే ఆకట్టుకుంది. కానీ ఓవరాల్‌గా అనుకున్నంతగా కమర్షియల్ సక్సెస్ కాలేదు.

కానీ ‘హిట్: ది సెకండ్ కేస్’లోకి సూపర్ ఫాంలో ఉన్న అడివి శేష్ రావడం.. ఈ సినిమాకు ప్రమోషన్లు గట్టిగా చేయడం, ప్రోమోలు కూడా అదిరిపోయేలా ఉండడం, సినిమాకు పాజిటివ్ టాక్ రావడంతో కమర్షియల్‌గా కూడా ‘హిట్-2’ పెద్ద రేంజికి వెళ్లిపోయింది. దీంతో మరింత ఉత్సాహంగా ‘హిట్-3’ చేయడానికి శైలేష్ అండ్ టీం రెడీ అవుతోంది.

ఐతే ‘హిట్-3’కి ఇంకా స్క్రిప్టే పూర్తి కాలేదు. అసలలా సినిమా ఎప్పుడు మొదలవుతుందో తెలియదు. కానీ అప్పుడే ఈ సినిమాకు ఓ రేంజి హైప్ ఇచ్చేస్తున్నారు. ముఖ్యంగా డైరెక్టర్ శైలేష్ కొలను వేస్తున్న ట్వీట్లు ఆశ్చర్యం కలిగిస్తున్నాయి.ఇంతకుముందు నాని అభిమాని ఒకరు తమ హీరోకు ఎలివేషన్లు మామూలుగా ఉండకూడదని అంటే.. ‘‘చంపేద్దాం బ్రో’’ అని బదులిచ్చిన శైలేష్.. తాజాగా విశ్వక్, నాని, శేష్‌లతో కలిసి ఉన్న ఫొటోను షేర్ చేస్తూ.. ‘‘పెద్దదే ప్లాన్ చేస్తున్నాం.

హిట్-3 చాలా పెద్దగా ఉండబోతోంది. ఫైర్ వర్క్స్ లోడింగ్’’ అని ట్వీట్ చేశాడు. అంతటితో ఆగకుండా అర్జున్ సర్కార్‌గా నాని కొత్త పోస్టర్‌ను రిలీజ్ చేసి.. ‘‘నా మాటలు గుర్తు పెట్టుకోండి. ‘హిట్-3’లో అర్జున్ సర్కార్‌తో నెక్స్ట్ లెవెల్ రాంపేజ్ క్రియేట్ చేయబోతున్నా’’ అని ఇంకో ట్వీట్ వేశాడు. ఈ రోజుల్లో ఇలా హైప్ పెంచడం బిజినెస్ పరంగా చాలా అవసరం. కానీ ఇంకా స్క్రిప్టు దశలో ఉన్న సినిమా గురించి ఈ రేంజి హైప్ ఇవ్వడం కరెక్టా.. మరీ ఇలా అంచనాలు పెంచేస్తే, రేప్పొద్దున సినిమా ఆ స్థాయిలో లేకుంటే కష్టం కదా అనే చర్చ నడుస్తోంది.