శ్రీలీలను ఇంక ఎవరూ ఆపలేరు

రాఘవేంద్రరావు ఆల్ టైం క్లాసిక్ కమ్ బ్లాక్‌బస్టర్లలో ఒకడైన ‘పెళ్ళిసందడి’ని రీక్రియేట్ చేస్తూ ‘పెళ్ళిసంద-డి’ పేరుతో గత ఏడాది వచ్చిన కొత్త సినిమా చూసి చాలామంది నెత్తీ నోరు బాదుకున్నారు. ఈ రోజుల్లో ఇలాంటి సినిమా ఏంటి.. మరీ ఇంత ఔట్ డేటెడ్ డ్రామానా అంటూ సినిమాను తీవ్రంగా విమర్శించారు.

ఐతే కంటెంట్ పరంగా చాలా పేలవం అయినప్పటికీ ఆ సినిమా బాక్సాఫీస్ దగ్గర బాగానే సందడి చేసింది. అందుక్కారణం.. అందమైన లీడ్ పెయిర్. శ్రీకాంత్ కొడుకు రోషన్, కొత్తమ్మాయి శ్రీలీల ఆ చిత్రానికి ప్రత్యేక ఆకర్షణగా నిలిచారు.

వీరి అందం, అభినయం.. పాటలు ప్లస్ అయి ‘పెళ్ళిసంద-డి’ బాగానే ఆడింది. ఈ సినిమాతో రోషన్‌కు కూడా మంచి పేరే వచ్చినప్పటికీ.. కొత్త సినిమా విషయంలో అతను ఆచితూచి వ్యవహరిస్తున్నాడు. కానీ శ్రీలీల మాత్రం ఆలస్యం చేయకుండా చకచకా సినిమాలు చేసేస్తోంది. ఆల్రెడీ రవితేజ సరసన ‘ధమాకా’.. బాలయ్యతో మరో సినిమా చేస్తున్న సంగతి తెలిసిందే. ఇవి కాక కన్నడలోనూ కొన్ని సినిమాలున్నాయి ఆమెకు.

ఐతే ఇప్పటిదాకా వచ్చిన ఛాన్సులన్నీ ఒకెత్తయితే.. ఇప్పుడు ఆమెను వరించిన మరో అవకాశం ఇంకో ఎత్తు అని టాలీవుడ్ టాక్. శ్రీలీల ఏకంగా సూపర్ స్టార్ మహేష్ బాబులో సినిమాలో ఛాన్స్ పట్టేసిందని జోరుగా ప్రచారం జరుగుతోంది సోషల్ మీడియాలో. త్రివిక్రమ్ దర్శకత్వంలో మహేష్ చేయనున్న కొత్త చిత్రంలో పూజా హెగ్డే ఒక కథానాయికగా ఎప్పుడో ఫిక్స్ అయింది.

కొన్నేళ్ల నుంచి త్రివిక్రమ్ ఆస్థాన కథానాయికగా కొనసాగుతోంది పూజా. త్రివిక్రమ్ సినిమాల్లో సెకండ్ హీరోయిన్ ఉండడం కూడా కామన్. ఐతే ఆ పాత్రకు మరీ ప్రాధాన్యం ఉండదు. అయినా సరే.. త్రివిక్రమ్-మహేష్ సినిమాలో అంటే పాత్ర ప్రాధాన్యం చూడకుండా ఎవ్వరైనా ఒప్పేసుకుంటారు.

శ్రీలీల కూడా అలాగే చేసిందని.. ఈ సినిమాకు సంతకం చేసేసిందని అంటున్నారు. తన సినిమాల్లో ముఖ్యమైన లేడీ క్యారెక్టర్‌ పెట్టడం.. దానికి సీనియర్ నటీమణుల్ని ఎంచుకోవడం త్రివిక్రమ్‌కు అలవాటు. ఈ సినిమాలోనూ ఆ ఆనవాయితీని కొనసాగిస్తున్నట్లు సమాచారం. డిసెంబరు తొలి వారంలో సెట్స్ మీదికి వెళ్లాల్సిన సినిమా కృష్ణ మరణంతో కొంచెం ఆలస్యం అయ్యేలా ఉంది.