రవితేజ క్రాక్ ఓటిటిలో వచ్చే వీల్లేదు!

ఫలానా సినిమా ఓటిటిలో రిలీజ్ అవుతుందనే వార్త ఇప్పుడు సినిమా మీడియాకు స్టాక్ ఆర్టికల్ గా మారింది. న్యూస్ దొరకడం కష్టమయిన టైంలో రోజుకో సినిమా ఓటిటి బాట పడుతోంది అని రాయడం రివాజుగా మారింది. అలాగే రవితేజ సినిమా క్రాక్ కూడా ఓటిటిలో వస్తుందంటూ ప్రచారం మొదలైంది.

అయితే ఈ సినిమా ఓటిటిలో రావాలంటే షూటింగ్ పూర్తి కావాలి కదా? ఇంకా పది రోజుల టాకీతో పాటు, మూడు పాటల చిత్రీకరణ మిగిలి ఉంది. పోనీ పాటలు తగ్గించుకున్నా… టాకీ అయితే పూర్తి చేయక తప్పదుగా. అంటే ఓటిటి రిలీజ్ కోసం రిస్క్ చేసి ఒక రెండు వారాలు షూటింగ్ చేయాలి. ఇప్పటి పరిస్థితులలో అన్ని రోజుల పాటు సెట్స్ కి వెళ్లడం జరిగే పని కాదు కనుక క్రాక్ సంగతి తేలాలంటే మళ్ళీ మాములు పరిస్థితులు రావాలి.

అదే జరిగితే ఇక ఓటిటిలో విడుదల చేయాల్సిన అవసరమే ఉండదు. అందుకే పూర్తయి ఫైనల్ కాపీ సిద్ధమయిన సినిమాలకు మాత్రమే ఇప్పుడు రిలీజ్ అయ్యే అవకాశం ఉంది. వాటిలో వి, రెడ్, ఉప్పెన లాంటి సినిమాలు మాత్రం ఎంతకాలం అయినా వేచి చూసేందుకే సిద్ధపడ్డాయి.