ఇక ఆ తప్పు చేయను: మంచు విష్ణు

మంచు విష్ణు కెరీర్లో హిట్లన్నీ చాలా వరకు కామెడీ ఎంటర్టైనర్లే. అతడికి తొలి విజయాన్నందించిన ఢీ.. ఆ తర్వాత సక్సెస్ అయిన దేనికైనా రెడీ, దూసుకెళ్తా.. ప్రేక్షకులకు మంచి వినోదాన్నందించాయి. కానీ ఆ తర్వాత అతను రకరకాల జానర్లలో సినిమాలు చేశాడు. అవి తేడా కొట్టాయి. ఇప్పుడు మళ్లీ తనకు అచ్చొచ్చిన కామెడీ జానర్లో జిన్నా చేశాడు. మధ్యలో అనవసరంగా వేరే జానర్లలో సినిమాలు చేసి ఇబ్బంది పడ్డానని.. ఇకపై ఆ తప్పు చేయనని మంచు విష్ణు అంటున్నాడు.

జిన్నా ప్రమోషన్లలో భాగంగా మీడియాను కలిసిన మంచు విష్ణు.. తన సినిమాల ఎంపిక, జిన్నా విశేషాల గురించి ఇంకా ఏం చెప్పాడంటే.. నేను ఇప్పుడు రెండు విషయాలు దృష్టిలో పెట్టుకుని సిినిమాలు చేస్తున్నా. మా అమ్మన్నీ, పిల్లల్నీ తీసుకెళ్లి సినిమా చూడగలిగేలా ఉండాలి. విపరీతంగా నవ్వుకోవాలి. ఆ రెండు లక్షణాలున్న కథలతోనే నా ప్రయాణం. జిన్నా సరిగ్గా అలాంటి సినిమానే.

ఈ సినిమా కథను మొదటిసారి నాకు చెప్పినపుడు కోన వెంకట్ గారు హీరో పాత్ర పేరు గాలి నాగేశ్వరరావు అని చెప్పగానే కనెక్ట్ అయ్యాను. అతను అప్పు చేసి టెంట్ హౌస్ పెడతాడు. ఐతే అతను ఏ పెళ్లికి టెంట్ హౌస్ సామాన్లు అద్దెకు ఇచ్చినా ఆ పెళ్ళి ఆగిపోతుంటుంది. దీంతో అతడి అప్పులు మరింత పెరిగి ఇబ్బంది పడుతుంటాడు.

ఇలాంటి జిన్నా జీవితం మధ్యలో అనుకోని మలుపు తిరుగుతుంది. ఆ మలుపు కథలో నేను చెప్పిన మార్పు ప్రకారం వచ్చేదే. ఇంటర్వెల్లో ప్రేక్షకులు కచ్చితంగా సర్ప్రైజ్ అవుతారు. లేదా షాకవుతారు. అదేంటన్నది తెర మీదే చూడాలి. ఈ సినిమా టైటిల్ విషయంలో కొన్ని వివాదాలు నడిచాయి. మాకు చెడు ఉద్దేశం ఏమీ లేదు కాబట్టి వాటిని పట్టించుకోం. నేను మాట్లాడినా వివాదమే. మాట్లాడకపోయినా వివాదమే. అందుకే నా పని నేను చూసుకుంటున్నా.. అని మంచు విష్ణు తెలిపాడు.