టాలెంటెడ్ హీరోకి అక్టోబర్ పరీక్ష

ఇండస్ట్రీకి ఎప్పుడో వచ్చినా సత్యదేవ్ లోని అసలైన నటుడు బయటికి వచ్చింది మాత్రం బ్లఫ్ మాస్టర్ తోనే. అదేమీ బ్లాక్ బస్టర్ కాదు కానీ దానికి పెట్టిన బడ్జెట్ కి, రీమేక్ హక్కులకు సరిపడా గిట్టుబాటు చేసుకుంది. అయితే ఆ తర్వాత చేసినవి ఈ విలక్షణ నటుడికి అంతగా అచ్చి రాలేదు. ఒకవైపు తమన్నాతో జంట కట్టిన గుర్తుందా శీతాకాలం విడుదల కోసం నానా కష్టాలు పడుతోంది. డేట్లు మారుతున్నాయి తప్ప థియేటర్లలో ఎప్పుడు వస్తుందో తనకూ తెలియదు. తనకు బ్రేక్ ఇచ్చిన దర్శకుడు గోపి గణేష్ తో ఆ మధ్య చేసిన గాడ్సే డిజాస్టర్ ఇచ్చిన షాక్ అలాంటిది. కృష్ణమ్మ సైతం తేదీ కోసం ఎదురు చూస్తోంది

ఇప్పుడు సత్యదేవ్ కు ఒకే నెలలో రెండు కీలక పరీక్షలు ఎదురు కాబోతున్నాయి. మొదటిది అక్టోబర్ 5న రానున్న గాడ్ ఫాదర్. నెగటివ్ షేడ్స్ లో చిరంజీవిని ఢీ కొట్టే ఛాలెంజింగ్ క్యారెక్టర్ ఇది. నయనతార భర్తనే పేరే కానీ మంచి విలనిజం ఉంటుంది ఈ పాత్రలో. కొన్ని సీన్లలో మెగాస్టార్ నే ఎదిరించే డైలాగులకు చాలా పేరొస్తుందని ఇప్పటికే టాక్ ఉంది. ఇది క్లిక్ అయితే హిందీలోనూ గుర్తింపు వస్తుంది. సల్మాన్ ఖాన్ క్యామియో చేసినందుకు బాలీవుడ్ లోనూ భారీ ఎత్తున పబ్లిసిటీతో ప్రమోట్ చేస్తున్నారు కాబట్టి హిట్ కొడితే ఆటోమేటిక్ గా అవకాశాలు పెరుగుతాయి.

రెండోది రామ్ సేతు. అక్షయ్ కుమార్ హీరోగా రూపొందిన ఈ విజువల్ ఫాంటసీ అక్టోబర్ 25న రిలీజ్ కానుంది. విజువల్ ఫాంటసీ బ్యాక్ డ్రాప్ తో అయోధ్య రాముడి సెంటిమెంట్ ని టచ్ చేస్తూ యాక్షన్ థ్రిల్లర్ గా రూపొందించారు. ఎప్పుడూ అక్షయ్ వెన్నంటే ఉండే ఓ ముఖ్యమైన పాత్రను సత్యదేవ్ కి ఇచ్చారు. కార్తికేయ 2 తరహాలో దీనికి మంచి పాజిటివ్ వైబ్స్ ఉన్నాయి. టీజర్ ప్రామిసింగ్ గా అనిపించింది. ఒకే దెబ్బకు డబుల్ పిట్టలన్నట్టు గాడ్ ఫాదర్, రామ్ సేతులు సక్సెస్ అయితే తెలుగు హిందీలో సత్యదేవ్ మార్కెట్ మళ్ళీ పుంజుకుంటుంది. వేచి చూడాలి మరి.