మెగా బ్యానర్ మీద అభిమానుల గుస్సా

స్వంత బ్యానర్ మీదే మెగా ఫ్యాన్స్ గుస్సా అవుతున్నారు. అచ్చం సైరా, ఆచార్య విషయంలో జరిగినట్టే గాడ్ ఫాదర్ కు సైతం ప్రమోషన్లు నిర్లిప్తంగా నిదానంగా ఉండటం వాళ్లకు నచ్చడం లేదు. చేతిలో నెల రోజులు కూడా లేని నేపథ్యంలో ఇంకెప్పుడు ప్రమోట్ చేయాలనుకుంటున్నారని సోషల్ మీడియాలో నిలదీస్తున్నారు. ఇందులో సూపర్ గుడ్ ఫిలింస్ నిర్మాణ భాగస్వామి అయినప్పటికీ కొణిదెల ప్రొడక్షన్స్ నే టార్గెట్ చేస్తున్నారు. ఎంత చిరంజీవి ఉన్నా సైలెంట్ గా ఉంటే హైప్ వచ్చే కాలం కాదిది. అది పదే పదే రుజువువుతున్నా మెగా టీమ్ లో మార్పు రావడం లేదనేది వాళ్ళ కంప్లయింట్.

నాగార్జున ది ఘోస్ట్ కూడా అక్టోబర్ 5నే వస్తోంది. ఇద్దరు మిత్రుల క్లాష్ ఎందుకని ఒకరు అడ్వాన్స్ 4నే రిలీజయ్యే అవకాశాల గురించి చర్చలు మొదలయ్యాయి. ఆల్రెడీ ఘోస్ట్ ట్రైలర్ వచ్చేసింది. యాక్షన్ థ్రిల్లర్ కాబట్టి పాటల గురించి పెద్దగా అంచనాలు లేవు. అసలు ఉన్నాయో లేదో తెలియదు. కానీ గాడ్ ఫాదర్ అలా కాదు. తమన్ మొదటిసారి మెగాస్టార్ మూవీకి కంప్లీట్ మ్యూజిక్ ఇస్తున్నాడు. ముఖ్యంగా సల్మాన్ ఖాన్ చిరుల కలయికలోని పాటని ఏ రేంజ్ లో కంపోజ్ చేశాడోనని మ్యూజిక్ లవర్స్ ఓ రేంజ్ లో అంచనాలు పెట్టుకున్నారు.

సానుకూల అంశాలు చాలానే ఉన్నప్పటికీ గాడ్ ఫాదర్ వాటిని క్యాష్ చేసుకోవడంలో నిర్లక్ష్యం వహిస్తోంది. ఆర్ఆర్ఆర్, బ్రహ్మాస్త్రల కోసం రాజమౌళి హీరోలను వెంటేసుకుని ఎంత పబ్లిసిటీ చేశాడో చూసి కూడా నేర్చుకోకపోతే ఎలానే ప్రశ్నలో అర్థముంది. లో బడ్జెట్ చిత్రాలే వారాల ముందు ఇంటర్వ్యూలు, ఈవెంట్లు గట్రా ప్లాన్ చేసుకుంటున్నాయి. నిన్నేదో ఫ్యాన్స్ తిడుతున్నారని గాడ్ ఫాదర్ ఫస్ట్ ఆడియో సింగల్ సూన్ అనే ట్వీట్ తో సరిపెట్టారు కానీ కనీసం అదైనా ఓ కొత్త పోస్టర్ తో అనౌన్స్ చేసుంటే బాగుండేది. చిరు రిలీజ్ కు ముందు వారం పది రోజులు హడావిడి చేయడం లాంటివి కాకుండా తన టీమ్ ని త్వరగా అలెర్ట్ చేయిస్తే మంచిది.