సినిమా బ్లాక్‌బస్టర్.. ఏమైనా లాభముందా?

కార్తికేయ-2.. ఈ మధ్య కాలంలో బిగ్గెస్ట్ బ్లాక్‌బస్టర్ అంటే ఈ చిత్రమే. ఈ సినిమా థియేట్రికల్ బిజినెస్ రూ.14 కోట్లకు జరిగితే.. దాని మీద నాలుగు రెట్ల షేర్ రాబట్టేలా కనిపిస్తోందీ చిత్రం. ఇప్పటికే ఈ సినిమా వరల్డ్ వైడ్ గ్రాస్ రూ.100 కోట్లు, షేర్ రూ.50 కోట్లు దాటిపోయింది. నాలుగో వారంలోనూ మంచి షేర్ రాబడుతూ ముందుకు సాగుతోంది ‘కార్తికేయ-2’. ఆర్ఆర్ఆర్, కేజీఎఫ్-2 సినిమాలు వెయ్యి కోట్ల మార్కును కూడా దాటి ఉండొచ్చు కానీ.. పెట్టుబడి-రాబడి కోణంలో చూస్తే ‘కార్తికేయ-2’ వాటిని మించిన బ్లాక్‌బస్టర్ అనడంలో సందేహం లేదు.

హిందీలో 50 షోలతో నామమాత్రంగా మొదలై థియేటర్లు, షోలను వేల సంఖ్యలకు పెంచుకుని కొన్ని వారాలుగా నార్త్ ఇండియాలో బాక్సాఫీస్ లీడర్‌గా కొనసాగుతోంది ‘కార్తికేయ-2’. ఈ సినిమా ఇంత ఘనవిజయం సాధించడం హీరో నిఖిల్ సిద్దార్థ, దర్శకుడు చందూ మొండేటి కెరీర్లకు పెద్ద ప్లస్ అనడంలో సందేహం లేదు. వారి తర్వాతి చిత్రాలకు ఉండే డిమాండే వేరుగా ఉంటుంది.

ఇక నిర్మాతలు ఈ సినిమాతో వచ్చిన లాభాలతో ఇంకో మూణ్నాలుగు సినిమాలు తీసుకోవచ్చు. ఐతే వీళ్లందరి పరిస్థితి బాగానే ఉంది కానీ.. హీరోయిన్ అనుపమ పరమేశ్వరన్‌కు మాత్రం సినిమా వల్ల పెద్దగా ప్రయోజనం లేనట్లే కనిపిస్తోంది. ‘కార్తికేయ-2’లో ఆమె పాత్ర అనుకున్నంతగా హైలైట్ కాలేదు. సినిమాలో ఎక్కడా తన టాలెంట్ చూపించే అవకాశం దక్కలేదు. లుక్స్ పరంగా అనుపమ కెరీర్లోనే అత్యంత సాధారణంగా కనిపించిన సినిమాగా దీన్ని చెప్పుకోవాలి.

ఇంతకు ముందున్న ఆకర్షణ ఇప్పుడు ఆమెలో కనిపించడం లేదు. ‘కార్తికేయ-2’కు సంబంధించి అందరూ ప్రశంసలు అందుకుంటున్నారు కానీ.. అనుపమకైతే పెద్దగా క్రెడిట్ దక్కట్లేదు. మొత్తంగా చూసుకుంటే ఈ సినిమా ఇంత ఘనవిజయం సాధించినా అనుపమ కెరీర్‌కైతే పెద్దగా ఉపయోగపడేలా లేదు. దీని తర్వాత నిఖిల్‌కు జోడీగా ఆమె నటించిన ‘18 పేజెస్’ రిలీజ్ కాబోతోంది. అది లవ్ స్టోరీ కాబట్టి అనుపమ హైలైట్ కావడానికి ఛాన్సుంది. ఆ సినిమా సక్సెస్ అయితే ఆమెకు ప్లస్ కావచ్చు.