మాచర్లకు రిపబ్లిక్ కనెక్షన్

వచ్చే నెల 12న విడుదల కాబోతున్న మాచర్ల నియోజకవర్గం మీద నితిన్ చాలా ఆశలు పెట్టుకున్నాడు. గత ఏడాది చెక్, రంగ్ దేలు థియేట్రికల్ గా బాగా నిరాశపరిచాయి. మాస్ట్రో ఓటిటిలో వచ్చింది కాబట్టి సరిపోయింది కానీ లేదంటే అది కూడా ఈ లిస్టులోనే చేరేది.

మాచర్లలో మాస్ ని టార్గెట్ చేసి మెసేజ్ ప్లస్ కమర్షియల్ ఎంటర్ టైన్మెంట్ మిక్స్ తో హిట్టు కొట్టాలనే సంకల్పంతో ఉన్నాడు. లాల్ సింగ్ చడ్డా, కార్తికేయ 2లు పోటీ పడుతున్నప్పటికీ వాటి కంటెంట్ తో పోలిస్తే మాచర్లకే రెగ్యులర్ ఆడియన్స్ మద్దతు ఎక్కువ దక్కే అవకాశం ఉంది

ఇందులో నితిన్ ఐఎఎస్ ఆఫీసర్ గా నటిస్తున్న సంగతి తెలిసిందే. దర్శకుడు ఎంఎస్ రాజశేఖర్ రెడ్డి ఈ పాత్రను చాలా పవర్ ఫుల్ గా డిజైన్ చేశారట. అయితే ఇది నిర్మాణంలో ఉన్నప్పుడు సాయి ధరమ్ తేజ్ రిపబ్లిక్ విడుదలయ్యింది. ఆశించిన అంచనాలు అందుకోలేకపోయింది. అందులోనూ హీరో పాత్ర కలెక్టరే. కథ పరంగా కొన్ని సారూప్యతలు ఉండటంతో అవి గుర్తుకు రాకుండా కీలక మార్పులతో మాచర్లకు డిఫరెంట్ ట్రీట్మెంట్ ఇచ్చారట. ఆ కారణంగానే కొంత ఆలస్యమయ్యిందనే ప్రచారం ఫిలింనగర్ వర్గాల్లో ఉంది.

ఇద్దరు యువ హీరోలు ఒకే పాత్ర చేసినప్పుడు సహజంగానే పోలికలు వస్తాయి. అందుకే మాచర్లకు రిపేర్లు జరిగాయని తెలిసింది. ఇప్పటికైతే అంజలి చేసిన ఐటెం సాంగ్ రారా రెడ్డి బాగా రీచ్ అయ్యింది. నితిన్ కృతి శెట్టిల పాట ఒకటి ఏకంగా ఫుల్ వీడియో రిలీజ్ చేసి షాక్ ఇచ్చారు.

ఇవాళ రాబోతున్న ట్రైలర్ ని బట్టి అంచనాల మోతాదు పెరగడమో తగ్గడమో ఉంటుంది. స్వంత బ్యానర్ లో ఇటీవలే విక్రమ్ రూపంలో పెద్ద బ్లాక్ బస్టర్ అందుకున్న నితిన్ ఫ్యామిలీకి ఇప్పుడిదీ హిట్ అయితే డబుల్ జాక్ పాట్ కొట్టినట్టే. చూద్దాం