విజయ్ 66 కోసం నాగార్జున ఓల్డ్ టైటిల్

తమిళ స్టార్ హీరో విజయ్ దర్శకుడు వంశీ పైడిపల్లి కాంబినేషన్ లో రూపొందుతున్న సినిమాకు టైటిల్ లాక్ చేసినట్టు లేటెస్ట్ అప్ డేట్. తమిళ వెర్షన్ కు వారరిసు, తెలుగులోవారసుడుగా డిసైడ్ చేశారట. యూనిట్ నుంచి అఫీషియల్ కన్ఫర్మేషన్ రాలేదు కానీ లీకవుతున్న సోర్స్ నుంచి సోషల్ మీడియా అప్పుడే వైరల్ అయిపోయింది.

ఇదేంటి ఇంత సాఫ్ట్ టైటిల్ పెడతారా అని విజయ్ అభిమానులు ట్విట్టర్ లో తమ అసంతృప్తిని వ్యక్తం చేయడం మొదలుపెట్టారు. విజయ్ తో మనకంత కనెక్షన్ లేదు కాబట్టి నో ప్రాబ్లమ్. ఈ టైటిల్ కు అక్కినేని నాగార్జునకు కనెక్షన్ ఉంది. 1993లో ఇదే పేరుతో నాగ్ కు సూపర్ హిట్ మూవీ ఉంది. కామెడీ చిత్రాలతో అప్పుడప్పుడే దర్శకులుగా ఎదుగుతున్న ఈవివి సత్యనారాయణగారిని స్టార్ డైరెక్టర్ గా మార్చేసింది ఈ సినిమానే.

హిందీ ఫూల్ ఔర్ కాంటే రీమేక్ గా తీసిన ఈ చిత్రంలో గాడ్ ఫాదర్ ధర్మతేజగా సూపర్ స్టార్ కృష్ణ గారి పెరఫార్మన్స్ ని అంత ఈజీగా మర్చిపోలేం. శ్రీకాంత్ ఇందులో నెగటివ్ షేడ్స్ తో ఉన్న క్యారెక్టర్ లో కనిపిస్తారు. టీవీలో వచ్చిన ప్రతిసారి మంచి ఎంటర్ టైనర్ గా ఫీలవుతారు ఆడియన్స్.

మరి అంత ట్రాక్ రికార్డు ఉన్న వారసుడు కంటే బెస్ట్ టైటిల్ విజయ్ కి ఇంకేముంటుంది. గత ఏడాది చిరంజీవి మాస్టర్ ని వాడేసుకున్నాడు. ఇప్పుడు దీని వంతు వచ్చింది. రష్మిక మందన్న ఇందులో హీరోయిన్ కాగా శరత్ కుమార్, సత్యరాజ్, ప్రభు, ప్రకాష్ రాజ్, జయసుధ, యోగిబాబు లాంటి పెద్ద క్యాస్టింగే ఉంది. ఈ వారసుడులోనూ మన శ్రీకాంత్ నటించడం మరో ట్విస్ట్. 2023 సంక్రాంతికి విడుదలకు ప్లాన్ చేసుకున్న నిర్మాత దిల్ రాజు ఇంకా ఆ విషయాన్ని అధికారికంగా ప్రకటించలేదు. త్వరలోనే చేస్తారు.