ప్రామిసింగ్ హీరోకు బాక్సాఫీస్ పరాభవం

ఐపీఎల్‌లో యాంకర్‌గా ప్రస్థానం మొదలుపెట్టి.. బాలీవుడ్లో చిన్న సినిమాల్లో క్యారెక్టర్ రోల్స్ ద్వారా ప్రతిభ చాటుకుని.. ఆ తర్వాత ‘విక్కీ డోనర్’తో హీరోగా మారి తొలి సినిమాతో భారీ విజయాన్నందుకుని.. ఆపై మరిన్ని సూపర్ హిట్లతో స్టార్ ఇమేజ్ సంపాదించిన నటుడు ఆయుష్మాన్ ఖురానా. పెద్ద స్టార్లలో ఆమిర్ ఖాన్ సినిమా అంటే చాలా బాగుంటుందని ఎలా అయితే ప్రేక్షకులు థియేటర్లకు వెళ్తారో, చిన్న, మీడియం రేంజ్ హీరోల్లో అలాంటి ఇమేజ్ సంపాదించిన నటుడు ఆయుష్మాన్.

ఇలాంటి హీరో.. తనకు ‘ఆర్టికల్ 15’ లాంటి మరపురాని చిత్రాన్ని అందించిన అనుభవ్ సిన్హాతో మళ్లీ జట్టు కడుతూ చేసిన సినిమా ‘అనేక్’. ఇప్పటిదాకా క్లాస్ టచ్ ఉన్న నాన్-యాక్షన్ సినిమాలే చేసిన ఆయుష్మాన్.. ఈసారి రూటు మార్చాడు. అండర్ కవర్ పోలీస్‌గా పూర్తి స్థాయి యాక్షన్ సినిమా చేశాడు. ఈ సినిమా ప్రోమోల్లో ఆయుష్మాన్ చేసిన యాక్షన్ విన్యాసాలు చూసి అంతా ఆశ్చర్యపోయారు. అతను టైగర్ ష్రాఫ్ స్టయిల్లో కనిపించాడు ఇందులో.

ఐతే ప్రేక్షకులకు ఆయుష్మాన్‌ను ఇలా చూడడం ఇష్టం లేనట్లుంది. శుక్రవారం రిలీజైన ‘అనేక్’ కనీస స్థాయిలోనూ ఆదరణ తెచ్చుకోలేకపోయింది. తొలి రోజు ప్రేక్షకులు లేక దేశవ్యాప్తంగా ఈ చిత్రానికి పెద్ద ఎత్తున షోలు క్యాన్సిల్ అయ్యాయట. ఒకప్పుడు డబుల్ డిజిట్ ఓపెనింగ్స్ రాబట్టిన ఆయుష్మాన్.. ఇప్పుడు తన కొత్త చిత్రంతో రాబట్టిన డే-1 నెట్ కలెక్షన్ రూ.1.5 కోట్లు మాత్రమే. ఇటీవలే వచ్చిన కంగనా రనౌత్ యాక్షన్ సినిమా ‘ధాకడ్’కు కూడా ఇలాంటి పరాభవమే ఎదురైంది బాక్సాఫీస్ దగ్గర. ఉత్తరాది ప్రేక్షకులు యాక్షన్‌ను ఇష్టపడుతున్నారు కానీ.. అది సౌత్ సినిమాల్లో చూపించే మసాలా యాక్షన్ టైపులో ఉండాలి.

క్లాస్‌గా కనిపిస్తూ యాక్షన్ విన్యాసాలు చేస్తే సరిపోదు. హీరోల పాత్రలు లార్జర్ దన్ లైఫ్ స్టయిల్లోఉండాలి. హీరో ఎలివేషన్ సరైన స్థాయిలో ఉండాలి. కొంచెం హంగామా తోడవ్వాలి. ఎమోషనల్ కనెక్ట్ ఉండాలి. పుష్ప, ఆర్ఆర్ఆర్, కేజీఎఫ్-2 సినిమాలు ఆ తరహాలోనే వారిని అమితంగా ఆకట్టుకున్నాయి. అవి చూసి బాలీవుడ్ స్టయిల్లో క్లాస్‌గా, సటిల్‌గా యాక్షన్ ఘట్టాలు తీస్తే వారికి ఆనట్లేదు. అందుకే ‘అనేక్’కు ఇలాంటి స్పందన ఎదురైనట్లుంది. ఈ సినిమాకు రివ్యూలు బాగానే ఉన్నా కూడా కలెక్షన్లు మాత్రం కనిపించడం లేదు.