విక్రమ్ & టాప్ గన్ – 36 ఏళ్ళ కనెక్షన్

కొన్ని సంగతులు కాకతాళీయంగా జరిగినా వాటి వెనుక ఆసక్తికరమైన విశేషాలు ఉంటాయి. అలాంటిదే ఇది కూడా. ఈ నెల 26న టామ్ క్రూజ్ నటించిన టాప్ గన్ మావెరిక్ ప్రపంచవ్యాప్తంగా భారీ ఎత్తున విడుదల కానుంది. హైదరాబాద్ లాంటి కీలక నగరాల్లో ఆల్రెడీ అడ్వాన్స్ బుకింగ్స్ కూడా మొదలైపోయాయి. ఇది 1986లో వచ్చిన బ్లాక్ బస్టర్ మూవీ టాప్ గన్ కి కొనసాగింపు. ముప్పై ఆరు సంవత్సరాల తర్వాత టామ్ క్రూజే ఇందులోనూ హీరోగా నటిస్తున్నాడు. ఒరిజినల్ ని మించిన యాక్షన్ ని ఇందులో దట్టించారు.

కమల్ హాసన్ నటించిన విక్రమ్ జూన్ 3న రిలీజ్ కానున్న సంగతి తెలిసిందే. విజయ్ సేతుపతి ఫహద్ ఫాసిల్ ల కాంబోతో పాటు సూర్య స్పెషల్ క్యామియో చేసిన ఈ యాక్షన్ ఎంటర్ టైనర్ కు లోకేష్ కనగరాజ్ దర్శకుడు. ఇదే టైటిల్ తో 1986లో కమల్ ఓ స్పై మూవీ చేశారు. ఆ ఏడాదిలో పెద్ద హిట్స్ లో ఇది ఒకటిగా నిలిచింది. ఇళయరాజా సంగీతం ఇప్పటికీ ఎవర్ గ్రీన్. తెలుగులోనూ మంచి విజయం అందుకుంది. కట్ చేస్తే అంతే గ్యాప్ తో అదే పేరుతో కమలే నటించిన విక్రమ్ 2022లో రాబోతోంది.

ఆయా పరిశ్రమల్లో గొప్ప పేరు ప్రఖ్యాతులు తెచ్చుకున్న ఇద్దరు హీరోలు ఇలా మూడు దశాబ్దాల తర్వాత టైటిల్స్ రిపీట్ చేయడం విశేషమేగా. దీని గురించే ఫ్యాన్స్ సోషల్ మీడియాలో వైరల్ గా చర్చించుకుంటున్నారు. అదే మేజిక్ టామ్, కమల్ ఇద్దరికీ రిపీట్ అవుతుందని చెప్పుకుంటున్నారు. రెండింటి మధ్య గ్యాప్ కేవలం వారం రోజులే ఉండటం గమనార్హం. ఓపెనింగ్స్ విషయంలో రికార్డులు బద్దలు కావడం ఖాయమని బజ్ ని చూస్తే అర్థమవుతోంది. మరి టాప్ గన్, విక్రమ్ లు ఏం చేయబోతున్నాయో చూడాలి