దర్శకుడికి యంగ్ హీరో షాక్

‘డీజే టిల్లు’తో ఒక్కసారిగా యూత్‌లో విపరీతమైన ఫాలోయింగ్ సంపాదించాడు యువ కథానాయకుడు సిద్ధు జొన్నలగడ్డ. ‘కృష్ణ అండ్ హిజ్ లీల’తోనే అతడికి మంచి గుర్తింపు వచ్చినప్పటికీ.. స్టార్ ఇమేజ్ వచ్చిందైతే ‘డీజే టిల్లు’తోనే. యూత్‌లో ఈ సినిమాతో అతడికి క్రేజ్ అమాంతం పెరిగిపోయింది. ఐతే ఈ సినిమా వల్ల ఇమేజ్ మారిపోవడంతో ఆల్రెడీ ఒప్పుకుని, షూటింగ్ కూడా చేస్తున్న ఓ సినిమా నుంచి సిద్ధు తప్పుకుని ఆ చిత్ర దర్శక నిర్మాతలకు పెద్ద షాక్ ఇచ్చినట్లు సమాచారం.

ఈ చిత్రం మలయాళ సూపర్ హిట్ ‘కప్పెల’కు రీమేక్. ‘డీజే టిల్లు’ను నిర్మించిన సితార ఎంటర్టైన్మెంట్స్ బేనర్లోనే ఈ సినిమా కూడా తెరకెక్కుతోంది. సుకుమార్ దగ్గర చాలా ఏళ్ల నుంచి పని చేస్తున్న రమేష్ అలియాస్ శౌరీ చంద్ర‌శేఖ‌ర్ ఈ చిత్రంతో దర్శకుడిగా పరిచయం అవుతున్నాడు. ఇందులో కథానాయికగా అనైకా సురేంద్రన్ నటిస్తోంది. మలయాళంలో అనా బెన్ పోషించిన పాత్ర ఇది.

హీరోయిన్ ఓరియెడెంట్ మూవీ అయిన ‘కప్పెలా’లో కథానాయికను మించి హైలైట్ అయ్యే ఒక పాత్ర ఉంటుంది. అక్కడ ఆ పాత్రను రోషన్ ఆండ్రూస్ చేశాడు. ఇది డిఫరెంట్ షేడ్స్ ఉన్న పాత్ర ఇది. ఆ పాత్ర తాలూకు ట్విస్ట్ చూసి చివర్లో షాక్ అయిపోతాం. తెలుగులో ఈ పాత్రకు సిద్ధు జొన్నలగడ్డను తీసుకున్నారు. ఈ చిత్రానికి ఓకే చెప్పే సమయానికి తన పాత్ర విషయంలో అతడికి అభ్యంతరాలేమీ లేకపోయాయి. డిఫరెంట్ షేడ్స్ ఉన్న ఆ పాత్రకు సిద్ధు బాగా సూటవుతాడు కూడా.

కానీ ఇప్పుడు ‘డీజే టిల్లు’తో తన ఇమేజ్ మారిపోవడంతో సిద్ధు ఈ పాత్ర విషయంలో పునరాలోచనలో పడ్డాడట. నిజానికి ఇప్పుడు చేసినా అతడికి ఆ పాత్ర వైవిధ్యంగానే ఉంటుంది. ప్రేక్షకులు అది చూసి కచ్చితంగా షాకవుతారు. సినిమాకు అతను పెద్ద ప్లస్ అవుతాడు కూడా. కానీ సిద్ధు ఆలోచన మరోలా ఉంది. మారిన తన ఇమేజ్‌కు ఈ పాత్ర సూటవ్వదని భావించి కొన్ని సన్నివేశాల్లో నటించాక ఇప్పుడు సినిమా చేయలేనని చెప్పి తప్పుకున్నాడట. దీంతో సినిమా అర్ధంతరంగా ఆగినట్లు తెలుస్తోంది. దర్శక నిర్మాతలు షాక్‌కు గురై.. ఇక చేసేది లేక ఆ పాత్ర కోసం వేరే నటుడిని చూస్తున్నారట.