కేజీఎఫ్-3.. కండిషన్స్ అప్లై

‘బాహుబలి: ది బిగినింగ్’కు కొనసాగింపుగా ‘ది కంక్లూజన్’ వచ్చాక ప్రేక్షకులు ‘బాహుబలి-3’ పట్ల ఆసక్తి ప్రదర్శించారు. ఈ కథను పొడిగిస్తే బాగుంటుందని, ఆ అద్భుత ప్రపంచాన్ని మరోసారి వెండితెరపైకి తెస్తే భలే ఉంటుందని అనుకున్నారు. కానీ రాజమౌళి అలాంటి ప్రయత్నమేదీ చేయలేదు. ఈ కథను కొనసాగించే ఉద్దేశమే లేదని అంటూ బాహుబలి ప్రపంచాన్ని కొనసాగించే అవకాశం ఉందని నర్మగర్భమైన కామెంట్ ఒకటి చేశాడు.

అంటే ఈ కథను అంతటితో వదిలేసి ఆ తరహా భారీ చిత్రం ఇంకోటి చేస్తాడేమో అనుకున్నారు. కానీ సమీప భవిష్యత్తులో అలాంటి సినిమా ఏదీ తెరకెక్కేలా కనిపించడం లేదు. ఇకపోతే ‘బాహుబలి’ తర్వాత ఆ స్థాయిలో భారతీయ ప్రేక్షకులను వెర్రెత్తించిన ‘కేజీఎఫ్’ నుంచి కొత్త సీక్వెల్ వస్తుందనే సంకేతాలు రావడంతో ఆసక్తికర చర్చ మొదలైంది. శుక్రవారం రిలీజైన ‘కేజీఎఫ్: చాప్టర్-2’ రోలింగ్ టైటిల్స్ అంతా అయ్యాక చూపించిన సీన్ చూసి అంతా షాక్ అయ్యారు.

‘కేజీఎఫ్-3’ ఉంటుందనే సంకేతాలు ఇప్పటిదాకా ఆ చిత్ర బృందం నుంచి ఎవ్వరూ ఇవ్వలేదు. ప్రశాంత్ కూడా దాని గురించి ఇప్పటిదాకా ఎక్కడా మాట్లాడలేదు. కానీ ‘చాప్టర్-2’ రోలింగ్ టైటిల్స్ అయిపోవస్తున్న దశలో రవీనా టాండన్ ‘కేజీఎఫ్ చాప్టర్-3’ అనే కొత్త పుస్తకం ముఖచిత్రాన్ని చూస్తున్న దృశ్యం పెట్టడంతో ఈ సిరీస్‌లో ఇంకో సినిమా వచ్చే అవకాశాలున్నాయని అర్థమైంది. ఐతే ఇందులో ఇలా చూపించారని కచ్చితంగా మూడో పార్ట్ వస్తుందని అనుకోలేం.

ఎందుకంటే సెకండ్ పార్ట్‌కు ఎలాంటి స్పందన వస్తుందన్నది కీలకం. ఈ చిత్రానికి మిక్స్‌డ్ టాకే వస్తోంది ప్రస్తుతానికి. ఎలివేషన్లు, భారీతనం పక్కన పెడితే చాలా విషయాల్లో ‘కేజీఎఫ్-2’ ఫస్ట్ పార్ట్‌తో పోలిస్తే బలహీనమే. సెకండ్ పార్ట్ చూస్తుంటేనే ఓవర్ డోస్ ఫీలింగ్ కూడా కలిగింది. ఇందులో పెద్దగా కథే లేదు. బలవంతంగా సాగదీసినట్లు అనిపించింది.

ఇక ఈ కథను ఇంతకుమించి విస్తరించడానికి ఏం స్కోప్ ఉంది? సెకండ్ పార్టే ప్రేక్షకులను నిరాశకు గురి చేసినపుడు ఇంకో భాగం గురించి ఆలోచించడం కరెక్ట్ అనిపించుకోదు. బహుశా ఈ సినిమా థియేట్రికల్ రన్ ముగిసి రిజల్ట్ విషయంలో ఒక అంచనాకు వచ్చాక ఇంకో భాగం తీయాలా వద్దా అనే విషయంలో ఒక నిర్ణయం తీసుకుంటారేమో.