హిందీ ‘జెర్సీ’కి కొత్త కష్టం

తెలుగులో మూడేళ్ల కిందట వచ్చిన నాని సినిమా ‘జెర్సీ’ ఒక క్లాసిక్‌గా పేరు తెచ్చుకుంది. కమర్షియల్‌గా ఇంకా పెద్ద సక్సెస్ కావాల్సిన ఆ సినిమా ఓ మోస్తరు విజయంతో సరిపెట్టుకుంది. ఐతే థియేటర్లలో నుంచి వెళ్లిపోయాక ఆ సినిమా గొప్పదనమేంటో అందరికీ అర్థమైంది. ఓటీటీలో చూసి దీన్నో కల్ట్ మూవీగా కొనియాడారు అందరూ. బాలీవుడ్ వాళ్లకు ఈ చిత్రం తెగ నచ్చేసి షాహిద్ కపూర్ ప్రధాన పాత్రలో రీమేక్ చేశారు. ఈ సినిమా హిందీలో మొదలైనపుడే స్యూర్ షాట్ హిట్ అన్న అభిప్రాయాలు కలిగాయి.

తెలుగు వెర్షన్ ప్రొడ్యూసర్ నాగవంశీ, టాలీవుడ్ అగ్ర నిర్మాత దిల్ రాజు.. బాలీవుడ్ నిర్మాత అమన్ గిల్ కలిసి ఈ చిత్రాన్ని ఒరిజినల్ డైరెక్టర్ గౌతమ్ తిన్ననూరి దర్శకత్వంలోనే ఈ చిత్రాన్ని రీమేక్ చేశారు. ఐతే కరోనా సహా పలు కారణాలతో ఈ సినిమా బాగా ఆలస్యం అయింది. గత ఏడాది డిసెంబరు 31న విడుదలకు అన్ని ఏర్పాట్లూ చేశాక కొవిడ్ థర్డ్ వేవ్ ధాటికి సినిమాను హఠాత్తుగా వాయిదా వేయాల్సి వచ్చింది. ఇక ఏప్రిల్ 14వ తేదీకి సినిమాను షెడ్యూల్ చేసి ‘కేజీఎఫ్-2’ దూకుడుతో భయపడి 22వ తేదీకి సినిమాను పోస్ట్ పోన్ చేశారు.

ఐతే ఇప్పుడు మళ్లీ ‘జెర్సీ’కి కొత్త తలనొప్పి మొదలైంది. ఈ సినిమా విడుదల ఆపాలంటూ ఇప్పుడు కోర్టులో పిటిషన్ దాఖలు కావడం నిర్మాతలను టెన్షన్ పెడుతోంది. ఆల్రెడీ తెలుగులో రిలీజైన మూడేళ్లు దాటాక, దాని హిందీ వెర్షన్ రిలీజ్‌కు ముందు ఈ కథను కాపీ కొట్టారంటూ ఓ రచయిత కోర్టు మెట్లు ఎక్కడం ఆశ్చర్యం కలిగించే విషయం. ఆ రచయిత పేరు రూపేశ్ జైశ్వాల్. 2007లో తాను ‘ది వాల్’ పేరుతో ఓ కథ రాసి.. స్క్రిప్టును రిజిస్టర్ కూడా చేయించానని.. తాను రాసిన కథలో కథంతా ఒక యువకుడి పాత్ర చుట్టూ తిరుగుతుందని, పూర్తిగా క్రికెట్ నేపథ్యంలోనే నడిచే ఆ కథలో కుటుంబం, ప్రేమ, ఆశయం లాంటి అంశాలు ప్రధానంగా ఉంటాయని.. ఆ కథను కాపీ కొట్టే ‘జెర్సీ’ సినిమా తీశారని సదరు రచయితగా కోర్టులో పిటిషన్ వేయడం గమనార్హం.

ఐతే ‘జెర్సీ’ కథ రాసింది.. సినిమా తీసింది ఒక తెలుగు దర్శకుడు. అతను ముందు తెలుగులో ఈ సినిమా తీశాడు. అప్పుడు ఎవరి నుంచి ఏ అభ్యంతరాలు రాలేదు. ఇప్పుడు అదే సినిమా హిందీలో రీమేక్ అయితే.. ఓ హిందీ రచయిత ఈ కథ తనదంటూ కోర్టును ఆశ్రయించడం విడ్డూరంగా అనిపిస్తోంది. మరి ఈ అడ్డంకిని ‘జెర్సీ’ టీం ఎలా అధిగమిస్తుందో చూడాలి.